har sher ko gulab kiya kya ghalat kiya

har sher ko gulāb kiyā kyā ġhalat kiyā

haañ terā intiḳhāb kiyā kyā ġhalat kiyā

rauñdā nahīñ kabhī kisī jugnū ko zer-e-pā

zarre ko āftāb kiyā kyā ġhalat kiyā

lab par har ek shaḳhs ke thī maslahat kī mohr

ham ne hī kuchh ḳhitāb kiyā kyā ġhalat kiyā

jo māvara-e-zehn-e-faqīhāñ thā vo gunāh

us kā bhī irtikāb kiyā kyā ġhalat kiyā

kab tak piseñge zulm kī chakkī meñ mere log

elān-e-inqalāb kiyā kyā ġhalat kiyā

jo dushman-e-avām the nafrat unhīñ se kī

aur ishq be-hisāb kiyā kyā ġhalat kiyā

is aas meñ ki sab ko mayassar ho sukh kī niiñd

qurbāñ har ek ḳhvāb kiyā kyā ġhalat kiyā

aayā adab barā-e-adab kā ḳhayāl jab

likhne kā band baab kiyā kyā ġhalat kiyā

'ḳhālid' rahe na sab kī tarah bas qalam qulī

zulmat ko be-naqāb kiyā kyā ġhalat kiyā

har sher ko gulab kiya kya ghalat kiya

han tera intiKHab kiya kya ghalat kiya

raunda nahin kabhi kisi jugnu ko zer-e-pa

zarre ko aaftab kiya kya ghalat kiya

lab par har ek shaKHs ke thi maslahat ki mohr

hum ne hi kuchh KHitab kiya kya ghalat kiya

jo mawara-e-zehn-e-faqihan tha wo gunah

us ka bhi irtikab kiya kya ghalat kiya

kab tak pisenge zulm ki chakki mein mere log

elan-e-inqalab kiya kya ghalat kiya

jo dushman-e-awam the nafrat unhin se ki

aur ishq be-hisab kiya kya ghalat kiya

is aas mein ki sab ko mayassar ho sukh ki nind

qurban har ek KHwab kiya kya ghalat kiya

aaya adab bara-e-adab ka KHayal jab

likhne ka band bab kiya kya ghalat kiya

'KHalid' rahe na sab ki tarah bas qalam quli

zulmat ko be-naqab kiya kya ghalat kiya