har sher se mere tera paikar nikal aae

har she'r se mere tirā paikar nikal aa.e

manzar ko haTā kar pas-e-manzar nikal aa.e

ye kaun nikal aayā yahāñ sair-e-chaman ko

shāḳhoñ se mahakte hue zevar nikal aa.e

is baar bulāve meñ kisī māh-jabīñ ke

vo zor-talab thā ki mire par nikal aa.e

ye vasl sikandar ke muqaddar meñ nahīñ thā

ham kaise muqaddar ke sikandar nikal aa.e

shab aa.ī to zulmat kī mazammat meñ sitāre

dīvār-e-falak toḌ ke bāhar nikal aa.e

us baat kā āñdhī ko gumāñ bhī nahīñ hogā

lo ek thī fānūs bahattar nikal aa.e

ilhām kā mausam utar aatā hai zamīñ par

bastī meñ agar ek suḳhanvar nikal aa.e

un sañg-zanoñ meñ koī apnā bhī thā shāyad

jo Dher se ye qīmtī patthar nikal aa.e

pindār-e-hunar zauq-e-nazar shiddat-e-iḳhlās

duniyā ke muqābil mire lashkar nikal aa.e

kuchh soch ke ummīd-e-vafā bāñdhte 'anjum'

chashme kī jagah kaise samundar nikal aa.e

har she'r se mere tera paikar nikal aae

manzar ko haTa kar pas-e-manzar nikal aae

ye kaun nikal aaya yahan sair-e-chaman ko

shaKHon se mahakte hue zewar nikal aae

is bar bulawe mein kisi mah-jabin ke

wo zor-talab tha ki mere par nikal aae

ye wasl sikandar ke muqaddar mein nahin tha

hum kaise muqaddar ke sikandar nikal aae

shab aai to zulmat ki mazammat mein sitare

diwar-e-falak toD ke bahar nikal aae

us baat ka aandhi ko guman bhi nahin hoga

lo ek thi fanus bahattar nikal aae

ilham ka mausam utar aata hai zamin par

basti mein agar ek suKHanwar nikal aae

un sang-zanon mein koi apna bhi tha shayad

jo Dher se ye qimti patthar nikal aae

pindar-e-hunar zauq-e-nazar shiddat-e-iKHlas

duniya ke muqabil mere lashkar nikal aae

kuchh soch ke ummid-e-wafa bandhte 'anjum'

chashme ki jagah kaise samundar nikal aae