har-su hai aaj waqt ke maron ka silsila

har-sū hai aaj vaqt ke māroñ kā silsila

allah-re dardnāk nazāroñ kā silsila

pesh-e-nazar hai shoḳh nigāroñ kā silsila

rangoñ kā qāfila hai bahāroñ kā silsila

baḌhtā gayā fareb-e-tamannā ke faiz se

un kī nigāh-e-nāz ke māroñ kā silsila

kaisā karam kiyā hai ye fasl-e-bahār ne

gulshan meñ har taraf hai sharāroñ kā silsila

rātoñ ko terī yaad meñ aañsū bahā kiye

lauTā kabhī na chāñd sitāroñ kā silsila

kab hai mire junūñ ko gavārā bahār meñ

dāman se jeb tak rahe tāroñ kā silsila

dekheñ to aap 'mīr' se 'ġhālib' ke daur tak

raushan hai kitnā sīna-figāroñ kā silsila

is daur meñ bhī mast-e-sharāb-e-vafā huuñ maiñ

qaa.em hai mujh se bāda-gusāroñ kā silsila

gulzār-e-kā.enāt kī tanzīm dekhiye

phūloñ ke ās-pās hai ḳhāroñ kā silsila

'ishrat bharosa un kī nigāhoñ pe kyā kareñ

vo bhī hai ek jhūTe sahāroñ kā silsila

har-su hai aaj waqt ke maron ka silsila

allah-re dardnak nazaron ka silsila

pesh-e-nazar hai shoKH nigaron ka silsila

rangon ka qafila hai bahaaron ka silsila

baDhta gaya fareb-e-tamanna ke faiz se

un ki nigah-e-naz ke maron ka silsila

kaisa karam kiya hai ye fasl-e-bahaar ne

gulshan mein har taraf hai shararon ka silsila

raaton ko teri yaad mein aansu baha kiye

lauTa kabhi na chand sitaron ka silsila

kab hai mere junun ko gawara bahaar mein

daman se jeb tak rahe taron ka silsila

dekhen to aap 'mir' se 'ghaalib' ke daur tak

raushan hai kitna sina-figaron ka silsila

is daur mein bhi mast-e-sharab-e-wafa hun main

qaem hai mujh se baada-gusaron ka silsila

gulzar-e-kaenat ki tanzim dekhiye

phulon ke aas-pas hai KHaron ka silsila

'ishrat bharosa un ki nigahon pe kya karen

wo bhi hai ek jhuTe sahaaron ka silsila