har tajraba shikar-e-fareb-e-nazar hua

har tajraba shikār-e-fareb-e-nazar huā

kin zulmatoñ pe aah gumān-e-sahar huā

kis kis adā se aaj koī jalva-gar huā

aayā nazar ko hosh to dil be-ḳhabar huā

ai rahnumā jasārat-e-rahzan kī daad de

jo hādisa huā vo sar-e-rahguzar huā

hai āfrīñ jo hañste nahīñ haiñ tamām-umr

ham se to ek din bhī na ġham kā basar huā

pahle to arz-e-ġham kī ijāzat na deñge vo

vaqfa bahut qalīl sā hogā agar huā

rakkhī thī jis pe terā nasheman bahār meñ

kyā iltifāt-e-barq isī shāḳh par huā

ye pūchhnā abas hai dil-e-ḳhush-ḳhayāl se

ābād ham hue haiñ ki barbād ghar huā

har tajraba shikar-e-fareb-e-nazar hua

kin zulmaton pe aah guman-e-sahar hua

kis kis ada se aaj koi jalwa-gar hua

aaya nazar ko hosh to dil be-KHabar hua

ai rahnuma jasarat-e-rahzan ki dad de

jo hadisa hua wo sar-e-rahguzar hua

hai aafrin jo hanste nahin hain tamam-umr

hum se to ek din bhi na gham ka basar hua

pahle to arz-e-gham ki ijazat na denge wo

waqfa bahut qalil sa hoga agar hua

rakkhi thi jis pe tera nasheman bahaar mein

kya iltifat-e-barq isi shaKH par hua

ye puchhna abas hai dil-e-KHush-KHayal se

aabaad hum hue hain ki barbaad ghar hua