har talKH haqiqat ka izhaar bhi karna hai

har talḳh haqīqat kā iz.hār bhī karnā hai

duniyā meñ mohabbat kā parchār bhī karnā hai

be-ḳhvābī-e-paiham se bezār bhī karnā hai

bastī ko kisī sūrat bedār bhī karnā hai

dushman ke nishāne par kab tak yūñhī baiTheñge

ḳhud ko bhī bachānā hai aur vaar bhī karnā hai

shaffāf bhī rakhnā hai gulshan kī fazāoñ ko

har barg-e-gul-e-tar ko talvār bhī karnā hai

kāñToñ se ulajhne kī ḳhvāhish bhī nahīñ rakhte

phūloñ se mohabbat kā iz.hār bhī karnā hai

is jurm kī nauiyyat ma.alūm nahīñ kyā hai

inkār bhī karnā hai iqrār bhī karnā hai

hone bhī nahīñ denā bohrān koī paidā

moqif pe hameñ apne isrār bhī karnā hai

tai lamhoñ meñ kar Dāleñ sadiyoñ kā safar lekin

is raah ko ai 'rūhī' hamvār bhī karnā hai

har talKH haqiqat ka izhaar bhi karna hai

duniya mein mohabbat ka parchaar bhi karna hai

be-KHwabi-e-paiham se bezar bhi karna hai

basti ko kisi surat bedar bhi karna hai

dushman ke nishane par kab tak yunhi baiThenge

KHud ko bhi bachana hai aur war bhi karna hai

shaffaf bhi rakhna hai gulshan ki fazaon ko

har barg-e-gul-e-tar ko talwar bhi karna hai

kanTon se ulajhne ki KHwahish bhi nahin rakhte

phulon se mohabbat ka izhaar bhi karna hai

is jurm ki nauiyyat malum nahin kya hai

inkar bhi karna hai iqrar bhi karna hai

hone bhi nahin dena bohran koi paida

moqif pe hamein apne israr bhi karna hai

tai lamhon mein kar Dalen sadiyon ka safar lekin

is rah ko ai 'ruhi' hamwar bhi karna hai