har taraf jalwa-e-farozan hai

har taraf jalva-e-farozāñ hai

sahn-e-hastī meñ ik charāġhāñ hai

husn hī husn hai nigāhoñ meñ

zarra zarra guhar-badāmāñ hai

phuul to khil rahe haiñ gulshan meñ

apnī qismat hai apnā dāmāñ hai

ai vafā-nā-shanās vaqt batā

aaj phir kis se ahd-o-paimāñ hai

zindagī se janam kā saath mirā

zindagī mujh se kyoñ gurezāñ hai

aaj mausam hasīñ hai jān-e-bahār

aaj chaliye ki bād-o-bārāñ hai

maujzan ek qulzum-e-ḳhūñ hai

Duubī Duubī sī nabz-e-daurāñ hai

saañs lenā nasīb hai mujh ko

zindagī pe bhī terā ehsāñ hai

jis ko insāniyat se nafrat hai

ahd-e-hāzir ye terā insāñ hai

jis kī takmīl aaj tak na huī

maiñ huuñ aur mere dil kā armāñ hai

'faiz' ko pūchhte raho yaaro

sunte haiñ ik ajiib insāñ hai

har taraf jalwa-e-farozan hai

sahn-e-hasti mein ek charaghan hai

husn hi husn hai nigahon mein

zarra zarra guhar-badaman hai

phul to khil rahe hain gulshan mein

apni qismat hai apna daman hai

ai wafa-na-shanas waqt bata

aaj phir kis se ahd-o-paiman hai

zindagi se janam ka sath mera

zindagi mujh se kyon gurezan hai

aaj mausam hasin hai jaan-e-bahaar

aaj chaliye ki baad-o-baran hai

maujzan ek qulzum-e-KHun hai

Dubi Dubi si nabz-e-dauran hai

sans lena nasib hai mujh ko

zindagi pe bhi tera ehsan hai

jis ko insaniyat se nafrat hai

ahd-e-hazir ye tera insan hai

jis ki takmil aaj tak na hui

main hun aur mere dil ka arman hai

'faiz' ko puchhte raho yaro

sunte hain ek ajib insan hai