har taraf majma-e-ashiqan hai

har taraf majma-e-āshiqāñ hai

tere dam kā ye saarā samāñ hai

itnā maġhrūr kyuuñ bāġhbāñ hai

ye chaman chaar din meñ ḳhizāñ hai

ishq meñ be-ḳhabar ho gayā huuñ

kis se pūchhūñ mirā dil kahāñ hai

kuchh nahīñ sūjhtī sair-e-gulshan

merī āñkhoñ se vo gul nihāñ hai

dhyān āThoñ-pahar hai usī kā

maiñ yahāñ huuñ mirā dil vahāñ hai

siine par rakh ke sotā huuñ us ko

us kī tasvīr ārām-e-jāñ hai

aañsū bahne lage dekhte hī

zulf-e-mahbūb hai yā dhuāñ hai

jaan parvāna hai us parī par

sham-e-sozāñ har ik ustuḳhvāñ hai

be-muravvat hai vo bevafā hai

saarī mehnat mirī rā.egāñ hai

kyā taḌapte guzarte hī apne

dard-e-dil meñ hai lab par fuġhāñ hai

hijr meñ kyuuñ nahīñ maut aatī

haa.e kyā dāġh-e-dil maraz-e-jāñ hai

DhūñDhtā huuñ maiñ yūsuf ko apne

ḳhaak mere pas-e-kārvāñ hai

jām-e-mul haath meñ vo baġhal meñ

'bahr' apnī ye qismat kahāñ hai

har taraf majma-e-ashiqan hai

tere dam ka ye sara saman hai

itna maghrur kyun baghban hai

ye chaman chaar din mein KHizan hai

ishq mein be-KHabar ho gaya hun

kis se puchhun mera dil kahan hai

kuchh nahin sujhti sair-e-gulshan

meri aankhon se wo gul nihan hai

dhyan aaThon-pahar hai usi ka

main yahan hun mera dil wahan hai

sine par rakh ke sota hun us ko

us ki taswir aaram-e-jaan hai

aansu bahne lage dekhte hi

zulf-e-mahbub hai ya dhuan hai

jaan parwana hai us pari par

sham-e-sozan har ek ustuKHwan hai

be-murawwat hai wo bewafa hai

sari mehnat meri raegan hai

kya taDapte guzarte hi apne

dard-e-dil mein hai lab par fughan hai

hijr mein kyun nahin maut aati

hae kya dagh-e-dil maraz-e-jaan hai

DhunDhta hun main yusuf ko apne

KHak mere pas-e-karwan hai

jam-e-mul hath mein wo baghal mein

'bahr' apni ye qismat kahan hai