har taraf raat ka phaila hua dariya dekhun

har taraf raat kā phailā huā dariyā dekhūñ

kis taraf jā.ūñ kahāñ Thahrūñ ki chehrā dekhūñ

kis jagah Thahrūñ ki maazī kā sarāpā dekhūñ

apne qadmoñ ke nishāñ par tirā rasta dekhūñ

kab se maiñ jaag rahā huuñ ye batā.ūñ kaise

aañkh lag jaa.e to mumkin hai saverā dekhūñ

nā-ḳhudā zaat kī patvār sambhāle rakhnā

jab havā tez chale ḳhud ko shikasta dekhūñ

din jo Dhal jaa.e to phir dard koī jaag uThe

shaam ho jaa.e to phir aap kā rasta dekhūñ

ab ye aalam hai ki tanhā.ī hī tanhā.ī hai

ye tamannā thī kabhī ḳhud ko bhī tanhā dekhūñ

dīda-e-ḳhvāb ko ummīd-e-mulāqāt na de

kis tarah apne hī ḳhvāboñ ko sisaktā dekhūñ

rañg dhul jaa.eñ ġhubār-e-ġham-e-hastī ke 'asar'

ab ke manzar koī dekhūñ to anokhā dekhūñ

har taraf raat ka phaila hua dariya dekhun

kis taraf jaun kahan Thahrun ki chehra dekhun

kis jagah Thahrun ki mazi ka sarapa dekhun

apne qadmon ke nishan par tera rasta dekhun

kab se main jag raha hun ye bataun kaise

aankh lag jae to mumkin hai sawera dekhun

na-KHuda zat ki patwar sambhaale rakhna

jab hawa tez chale KHud ko shikasta dekhun

din jo Dhal jae to phir dard koi jag uThe

sham ho jae to phir aap ka rasta dekhun

ab ye aalam hai ki tanhai hi tanhai hai

ye tamanna thi kabhi KHud ko bhi tanha dekhun

dida-e-KHwab ko ummid-e-mulaqat na de

kis tarah apne hi KHwabon ko sisakta dekhun

rang dhul jaen ghubar-e-gham-e-hasti ke 'asar'

ab ke manzar koi dekhun to anokha dekhun