har taraf ret ka ijara hai

har taraf ret kā ijārā hai

ya.anī sahrā meñ bhī ḳhasārā hai

rah ga.e haiñ ham aadhe shāḳhoñ par

us ne yuuñ khīñch kar utārā hai

paañv dho jā hamārī miTTī par

in zamīnoñ kā paanī khārā hai

ham paḌe rah ga.e haiñ tah meñ kahīñ

aap ne ḳhud ko yuuñ nithārā hai

jaan par ban ga.ī hai ḳhushbū kī

tū ne gul-dān kyā sañvārā hai

aa.ina qaht meñ huā ījād

ḳhud-parastī kā isti.ārā hai

vaqt ke bhaav baḌh ga.e haiñ 'munīr'

zindagī kā ajab guzārā hai

har taraf ret ka ijara hai

yani sahra mein bhi KHasara hai

rah gae hain hum aadhe shaKHon par

us ne yun khinch kar utara hai

panw dho ja hamari miTTi par

in zaminon ka pani khaara hai

hum paDe rah gae hain tah mein kahin

aap ne KHud ko yun nithaara hai

jaan par ban gai hai KHushbu ki

tu ne gul-dan kya sanwara hai

aaina qaht mein hua ijad

KHud-parasti ka istiara hai

waqt ke bhaw baDh gae hain 'munir'

zindagi ka ajab guzara hai