har taraf satwat-e-arzang dikhai degi

har taraf satvat-e-arzañg dikhā.ī degī

rañg barseñge zamīñ dañg dikhā.ī degī

bārish-e-ḳhūn-e-shahīdāñ se vo aa.egī bahār

saarī dhartī hameñ gul-rañg dikhā.ī degī

parbatoñ se nikal ā.eñge thirakte paikar

naġhma-zan, ḳhāmushī-e-sañg dikhā.ī degī

raaz meñ rah na sakegī koī iz.hār kī lai

ik na ik sūrat-e-āhañg dikhā.ī degī

soch ko jur.at-e-parvāz to mil lene do

ye zamīñ aur hameñ tañg dikhā.ī degī

taaj kāñToñ kā sahī ek na ik din lekin

āshiqī zīnat-e-aurañg dikhā.ī degī

jab bhī parkhegā koī pyaar ke me.ayār 'qatīl'

saarī duniyā mire pasañg dikhā.ī degī

har taraf satwat-e-arzang dikhai degi

rang barsenge zamin dang dikhai degi

barish-e-KHun-e-shahidan se wo aaegi bahaar

sari dharti hamein gul-rang dikhai degi

parbaton se nikal aaenge thirakte paikar

naghma-zan, KHamushi-e-sang dikhai degi

raaz mein rah na sakegi koi izhaar ki lai

ek na ek surat-e-ahang dikhai degi

soch ko jurat-e-parwaz to mil lene do

ye zamin aur hamein tang dikhai degi

taj kanTon ka sahi ek na ek din lekin

aashiqi zinat-e-aurang dikhai degi

jab bhi parkhega koi pyar ke meayar 'qatil'

sari duniya mere pasang dikhai degi