har taraf sine mein uski hi khaTak rahti hai

har taraf siine meñ us kī hī khaTak rahtī hai

jo shafaq-rang kahīñ zer-e-falak rahtī hai

puurī ho jaatī agar koī kahānī hotī

ye mohabbat hai miyāñ is meñ kasak rahtī hai

ab samajh aa.ī ḳhushī kyā hai dil-e-afsurda

ye na ho to kahāñ chehroñ pe chamak rahtī hai

us ke aane kā pata hī nahīñ chaltā koī

jis ke jaane kī ḳhabar der talak rahtī hai

jitnā bhī dekhūñ use aise mujhe lagtā hai

dekhne vaalī abhī ek jhalak rahtī hai

jab kabhī us kā tasavvur maiñ karūñ to us kī

jaane kab tak mirī sāñsoñ meñ mahak rahtī hai

dastakeñ detā hai andar se musalsal koī

ye jo dhak dhak mire siine meñ dhamak rahtī hai

us ke milne kā nahīñ hai koī imkān magar

muntazir ab bhī mire dil kī saḌak rahtī hai

mire atrāf koī raqs meñ rahtā hai 'zahūr'

ghuñghruoñ kī mire kānoñ meñ khanak rahtī hai

har taraf sine mein us ki hi khaTak rahti hai

jo shafaq-rang kahin zer-e-falak rahti hai

puri ho jati agar koi kahani hoti

ye mohabbat hai miyan is mein kasak rahti hai

ab samajh aai KHushi kya hai dil-e-afsurda

ye na ho to kahan chehron pe chamak rahti hai

us ke aane ka pata hi nahin chalta koi

jis ke jaane ki KHabar der talak rahti hai

jitna bhi dekhun use aise mujhe lagta hai

dekhne wali abhi ek jhalak rahti hai

jab kabhi us ka tasawwur main karun to us ki

jaane kab tak meri sanson mein mahak rahti hai

dastaken deta hai andar se musalsal koi

ye jo dhak dhak mere sine mein dhamak rahti hai

us ke milne ka nahin hai koi imkan magar

muntazir ab bhi mere dil ki saDak rahti hai

mere atraf koi raqs mein rahta hai 'zahur'

ghunghruon ki mere kanon mein khanak rahti hai