har tazkira kitab mein tafsil se hua

har tazkira kitāb meñ tafsīl se huā

merā safar shurūa hī takmīl se huā

is ḳhāk-dāñ pe phailne vaalā hai ek roz

jis qahr kā zuhūr kabhī niil se huā

har samt ghūmtī thī yahāñ raat jā-ba-jā

phir din tumhāre chehra-e-qindīl se huā

ugte haiñ sāhiloñ pe kisī phuul kī tarah

kaisā ye ishq tā.eroñ ko jhiil se huā

ye jo tumheñ ḳharāb nazar aa rahā huuñ maiñ

paidā ye mas.ala bhī kisī Dhiil se huā

ab dekhiye utartā hai kyā āsmān se

ik faisla to pahle abābīl se huā

har tazkira kitab mein tafsil se hua

mera safar shurua hi takmil se hua

is KHak-dan pe phailne wala hai ek roz

jis qahr ka zuhur kabhi nil se hua

har samt ghumti thi yahan raat ja-ba-ja

phir din tumhaare chehra-e-qindil se hua

ugte hain sahilon pe kisi phul ki tarah

kaisa ye ishq taeron ko jhil se hua

ye jo tumhein KHarab nazar aa raha hun main

paida ye masala bhi kisi Dhil se hua

ab dekhiye utarta hai kya aasman se

ek faisla to pahle ababil se hua