har uljhan se agar nikla nahin wo

har uljhan se agar niklā nahīñ vo

bichhaḌ jaa.e na ḳhud se bhī kahīñ vo

nadī aur pyaas donoñ darmiyāñ haiñ

jahāñ huuñ muddatoñ se maiñ vahīñ vo

nasha kaisā hai us ke dekhne meñ

surāhī vo nahīñ sāġhar nahīñ vo

use kyoñ naaz hai zor-e-numū par

maiñ bādal huuñ agar bhīgī zamīñ vo

maiñ jā saktā huuñ us ko chhoḌ kar bhī

abhī is baat ko samjhā nahīñ vo

sitāro kyoñ larazte ho abhī se

abhī to raqs ko uTThā nahīñ vo

achānak hī uThegā koī tūfāñ

kahīñ hoñge 'nafīs' aap aur kahīñ vo

har uljhan se agar nikla nahin wo

bichhaD jae na KHud se bhi kahin wo

nadi aur pyas donon darmiyan hain

jahan hun muddaton se main wahin wo

nasha kaisa hai us ke dekhne mein

surahi wo nahin saghar nahin wo

use kyon naz hai zor-e-numu par

main baadal hun agar bhigi zamin wo

main ja sakta hun us ko chhoD kar bhi

abhi is baat ko samjha nahin wo

sitaro kyon larazte ho abhi se

abhi to raqs ko uTTha nahin wo

achanak hi uThega koi tufan

kahin honge 'nafis' aap aur kahin wo