har uzw-e-badan ek se hai ek tera KHub

har uzv-e-badan ek se hai ek tirā ḳhuub

siine kī safā.ī se hai chehre kī safā ḳhuub

qāsid ke badan par alif-e-zaḳhm lage haiñ

ḳhat kā mire likkhā ye javāb aap ne kyā ḳhuub

āgāh nahīñ hai koī ahvāl se mere

jo mujh pe guzartī hai vo jaane hai ḳhudā ḳhuub

ban ban ke dahan halqa-e-gesū-e-musalsal

luuTe hai tire bosa-e-āriz kā mazā ḳhuub

abtar huā jo sher kahā zulf kā terī

bāñdhā koī mazmūn hinā kā to bañdhā ḳhuub

madfūñ kiyā terī hī galī meñ use āḳhir

paa.ī tire āshiq ne pas-e-marg bhī jā ḳhuub

do-chār hī shab maah to rahtā hai nahufta

muddat hui dekhā nahīñ vo maah chhupā ḳhuub

sharbat ke evaz sūda-e-almās pilāyā

kī aap ne bīmār-e-mohabbat kī davā ḳhuub

ruk ruk ke jo dam nikle hai mazbūh kā tere

kyā ḳhanjar-e-ḳhūñ-ḳhvār tirā tez na thā ḳhuub

maġhrūr na honā karam-e-yār pe 'ġhāfil'

pā.egā abhī dil ke lagāne kī sazā ḳhuub

har uzw-e-badan ek se hai ek tera KHub

sine ki safai se hai chehre ki safa KHub

qasid ke badan par alif-e-zaKHm lage hain

KHat ka mere likkha ye jawab aap ne kya KHub

aagah nahin hai koi ahwal se mere

jo mujh pe guzarti hai wo jaane hai KHuda KHub

ban ban ke dahan halqa-e-gesu-e-musalsal

luTe hai tere bosa-e-ariz ka maza KHub

abtar hua jo sher kaha zulf ka teri

bandha koi mazmun hina ka to bandha KHub

madfun kiya teri hi gali mein use aaKHir

pai tere aashiq ne pas-e-marg bhi ja KHub

do-chaar hi shab mah to rahta hai nahufta

muddat hui dekha nahin wo mah chhupa KHub

sharbat ke ewaz suda-e-almas pilaya

ki aap ne bimar-e-mohabbat ki dawa KHub

ruk ruk ke jo dam nikle hai mazbuh ka tere

kya KHanjar-e-KHun-KHwar tera tez na tha KHub

maghrur na hona karam-e-yar pe 'ghafil'

paega abhi dil ke lagane ki saza KHub