ہر وفا نا آشنا سے بھی وفا کرنا پڑی

ہر وفا نا آشنا سے بھی وفا کرنا پڑی

دل سے دشمن کے لئے اکثر دعا کرنا پڑی

میں ہوا رسوا تو میرا غم بھی رسوا ہو گیا

زندگی کی کس قدر قیمت ادا کرنا پڑی

اے نگاہ محتسب جو چاہے تو کہہ لے مجھے

جیتے جی اس دل کے ہاتھوں ہر خطا کرنا پڑی

ہے فریب دل بھی شاید وجہ تکمیل وفا

آرزوئے دل بھی ہم رنگ حنا کرنا پڑی

زیست کی خودداریوں پر حرف لانے کے لئے

دوستوں کو بھی کرم کی انتہا کرنا پڑی

اہل دل نے ہی بھرم رکھا غرور حسن کا

ورنہ تم بھی کہہ اٹھے تھے اب دعا کرنا پڑی

بے نگاہ لطف ساقی کام کچھ بنتا نہیں

حسن بے پروا سے حامدؔ التجا کرنا پڑی