har wafa na-ashna se bhi wafa karna paDi

har vafā nā-āshnā se bhī vafā karnā paḌī

dil se dushman ke liye aksar duā karnā paḌī

maiñ huā rusvā to merā ġham bhī rusvā ho gayā

zindagī kī kis qadar qīmat adā karnā paḌī

ai nigāh-e-mohtasib jo chāhe tū kah le mujhe

jīte-jī is dil ke hāthoñ har ḳhatā karnā paḌī

hai fareb-e-dil bhī shāyad vaj.h-e-takmīl-e-vafā

ārzū-e-dil bhī ham-rañg-e-hinā karnā paḌī

ziist kī ḳhuddāriyoñ par harf laane ke liye

dostoñ ko bhī karam kī intihā karnā paḌī

ahl-e-dil ne hī bharam rakkhā ġhurūr-e-husn kā

varna tum bhī kah uThe the ab duā karnā paḌī

be-nigāh-e-lutf-e-sāqī kaam kuchh bantā nahīñ

husn-e-be-parvā se 'hāmid' iltijā karnā paḌī

har wafa na-ashna se bhi wafa karna paDi

dil se dushman ke liye aksar dua karna paDi

main hua ruswa to mera gham bhi ruswa ho gaya

zindagi ki kis qadar qimat ada karna paDi

ai nigah-e-mohtasib jo chahe tu kah le mujhe

jite-ji is dil ke hathon har KHata karna paDi

hai fareb-e-dil bhi shayad wajh-e-takmil-e-wafa

aarzu-e-dil bhi ham-rang-e-hina karna paDi

zist ki KHuddariyon par harf lane ke liye

doston ko bhi karam ki intiha karna paDi

ahl-e-dil ne hi bharam rakkha ghurur-e-husn ka

warna tum bhi kah uThe the ab dua karna paDi

be-nigah-e-lutf-e-saqi kaam kuchh banta nahin

husn-e-be-parwa se 'hamid' iltija karna paDi