har zarra chaman-zar ki zinat ka sabab hai

har zarra chaman-zār kī zīnat kā sabab hai

mahfil meñ chaman-zār kī har shai kā adab hai

ik umr ba-dastūr guzar jaa.e to behtar

go dil meñ ba-dastūr Thaharne kī talab hai

kuchh yuuñ hai muqaddar kī haqīqat ki jahāñ meñ

zulmat hai kahīñ din meñ kahīñ nuur kī shab hai

har chiiz meñ ta.amīl ḳhirad kī na ho lekin

har chiiz pe us chiiz kā da.avā to ajab hai

rakhne ko tabaddul kā bharam muḌ ke jo dekhā

vaisī hī thī duniyā mirī jaisī ki vo ab hai

duniyā na ho firdaus par itnā to hai 'dānish'

jaisī bhī hai duniyā mirī hastī kā sabab hai

har zarra chaman-zar ki zinat ka sabab hai

mahfil mein chaman-zar ki har shai ka adab hai

ek umr ba-dastur guzar jae to behtar

go dil mein ba-dastur Thaharne ki talab hai

kuchh yun hai muqaddar ki haqiqat ki jahan mein

zulmat hai kahin din mein kahin nur ki shab hai

har chiz mein tamil KHirad ki na ho lekin

har chiz pe us chiz ka dawa to ajab hai

rakhne ko tabaddul ka bharam muD ke jo dekha

waisi hi thi duniya meri jaisi ki wo ab hai

duniya na ho firdaus par itna to hai 'danish'

jaisi bhi hai duniya meri hasti ka sabab hai