har zarra-e-alam muztar hai duniya mein sukun ka nam nahin

har zarra-e-ālam muztar hai duniyā meñ sukūñ kā naam nahīñ

hai kār-gah-e-sad-sa.ī-o-amal ye zāviya-e-ārām nahīñ

kar azm ko rāsiḳh dil ko qavī ab vaqt-e-ummīd-e-ḳhām nahīñ

ye lāla-o-gul kī bazm nahīñ ye mahfil-e-daur-e-jām nahīñ

ik ālam-e-jiddat taarī hai har aan taġhayyur jaarī hai

ab sub.h yahāñ vo sub.h nahīñ ab shaam yahāñ vo shaam nahīñ

hastī kī haqīqat kyā kahiye paikār-o-kashākash jehd-o-junūñ

ab vaqt-e-sukūn-e-ḳhvāb nahīñ ab ishrat kā hangām nahīñ

jumbish se numūd-e-hastī hai aur maut jumūd-e-hastī hai

ik mauj-e-ravāñ huuñ dariyā meñ sāhil se mujhe kuchh kaam nahīñ

tajdīd-e-tamanna zauq-e-amal ehsās-e-ḳhudī pindār-e-yaqīñ

jis meñ ye anāsir hoñ na baham maz.hab hai vo kufr islām nahīñ

vāmāñda raheñge ahal-e-shak aur jā pahuñchegā manzil tak

jo zauq-e-yaqīñ kā hāmil hai aur mo'taqid-e-auhām nahīñ

haq ziist kā us insāñ ko nahīñ jo jehd-e-musalsal kar na sake

jab tak na ho paiham gardish meñ vo bazm-e-tarab kā jaam nahīñ

ash.ār haiñ ye pur-josh 'valī' yā naġhme haiñ bedārī ke

iqbāl kā paiġhām un ko kaho tagore kā ye paiġhām nahīñ

har zarra-e-alam muztar hai duniya mein sukun ka nam nahin

hai kar-gah-e-sad-sai-o-amal ye zawiya-e-aram nahin

kar azm ko rasiKH dil ko qawi ab waqt-e-ummid-e-KHam nahin

ye lala-o-gul ki bazm nahin ye mahfil-e-daur-e-jam nahin

ek aalam-e-jiddat tari hai har aan taghayyur jari hai

ab subh yahan wo subh nahin ab sham yahan wo sham nahin

hasti ki haqiqat kya kahiye paikar-o-kashakash jehd-o-junun

ab waqt-e-sukun-e-KHwab nahin ab ishrat ka hangam nahin

jumbish se numud-e-hasti hai aur maut jumud-e-hasti hai

ek mauj-e-rawan hun dariya mein sahil se mujhe kuchh kaam nahin

tajdid-e-tamanna zauq-e-amal ehsas-e-KHudi pindar-e-yaqin

jis mein ye anasir hon na baham mazhab hai wo kufr islam nahin

wamanda rahenge ahal-e-shak aur ja pahunchega manzil tak

jo zauq-e-yaqin ka hamil hai aur mo'taqid-e-auham nahin

haq zist ka us insan ko nahin jo jehd-e-musalsal kar na sake

jab tak na ho paiham gardish mein wo bazm-e-tarab ka jam nahin

ashaar hain ye pur-josh 'wali' ya naghme hain bedari ke

iqbaal ka paigham un ko kaho tagore ka ye paigham nahin