har zehn riwayat ka maqtal na hua tha

har zehn rivāyāt kā maqtal na huā thā

vo aaj huā hai jo yahāñ kal na huā thā

kyuuñ dauḌ paḌī ḳhalq us ik shaḳhs ke pīchhe

kyā shahr meñ aage koī pāgal na huā thā

the band makānoñ kī tarah log pur-asrār

ik bāb-e-suḳhan thā jo muqaffal na huā thā

dil ḳhuun kiyā tum ne to paanī hue jazbe

ye mas.ala mujh se to kabhī hal na huā thā

tārīk thā apnī hī nazar kā koī pahlū

sūraj to kabhī aañkh se ojhal na huā thā

yuuñ us kī shujā'at huī mashkūk pas-e-jañg

tanhā vo sipāhī thā jo ghāyal na huā thā

kab safha-e-hastī pe thī qaa.em koī sūrat

vo naqsh thā baaqī jo mukammal na huā thā

thī din kī khulī dhuup mire ḳhuun kī pyāsī

sar merā charāġh-e-shab-e-maqtal na huā thā

har zehn riwayat ka maqtal na hua tha

wo aaj hua hai jo yahan kal na hua tha

kyun dauD paDi KHalq us ek shaKHs ke pichhe

kya shahr mein aage koi pagal na hua tha

the band makanon ki tarah log pur-asrar

ek bab-e-suKHan tha jo muqaffal na hua tha

dil KHun kiya tum ne to pani hue jazbe

ye masala mujh se to kabhi hal na hua tha

tarik tha apni hi nazar ka koi pahlu

suraj to kabhi aankh se ojhal na hua tha

yun us ki shuja'at hui mashkuk pas-e-jang

tanha wo sipahi tha jo ghayal na hua tha

kab safha-e-hasti pe thi qaem koi surat

wo naqsh tha baqi jo mukammal na hua tha

thi din ki khuli dhup mere KHun ki pyasi

sar mera charagh-e-shab-e-maqtal na hua tha