har zi-hayat ka hai sabab jo hayat ka

har zī-hayāt kā hai sabab jo hayāt kā

nikle hai jī hī us ke liye kā.enāt kā

bikhrī hai zulf us ruḳh-e-ālam-faroz par

varna banāo hove na din aur raat kā

dar-parda vo hī mā'nī muqavvam na hoñ agar

sūrat na pakḌe kaam falak ke sabāt kā

haiñ mustahīl ḳhaak se ajzā-e-nau-ḳhatāñ

kyā sahl hai zamīñ se nikalnā nabāt kā

mustahlak us ke 'ishq ke jāneñ haiñ qadar-e-marg

īsā-o-ḳhizr ko hai maza kab vafāt kā

ashjār hoveñ ḳhāma-o-āb-e-siyah-behār

likhnā na to bhī ho sake us kī sifāt kā

us ke faroġh-e-husn se jhumke hai sab meñ nuur

sham-e-haram ho yā ki diyā somnāt kā

bizzāt hai jahāñ meñ vo maujūd har jagah

hai diid chashm-e-dil ke khule ain zaat kā

har safhe meñ hai mahv-e-kalām apnā das jagah

mus.haf ko khol dekh Tak andāz baat kā

ham muzniboñ meñ sirf karam se hai guftugū

mazkūr zikr yaañ nahīñ saum-o-salāt kā

kyā 'mīr' tujh ko nāma-syāhī kā fikr hai

ḳhatm-e-rusul sā shaḳhs hai zāmin najāt kā

har zi-hayat ka hai sabab jo hayat ka

nikle hai ji hi us ke liye kaenat ka

bikhri hai zulf us ruKH-e-alam-faroz par

warna banao howe na din aur raat ka

dar-parda wo hi ma'ni muqawwam na hon agar

surat na pakDe kaam falak ke sabaat ka

hain mustahil KHak se ajza-e-nau-KHatan

kya sahl hai zamin se nikalna nabaat ka

mustahlak us ke 'ishq ke jaanen hain qadar-e-marg

isa-o-KHizr ko hai maza kab wafat ka

ashjar howen KHama-o-ab-e-siyah-behaar

likhna na to bhi ho sake us ki sifat ka

us ke farogh-e-husn se jhumke hai sab mein nur

sham-e-haram ho ya ki diya somnat ka

bizzat hai jahan mein wo maujud har jagah

hai did chashm-e-dil ke khule ain zat ka

har safhe mein hai mahw-e-kalam apna das jagah

mushaf ko khol dekh Tak andaz baat ka

hum muznibon mein sirf karam se hai guftugu

mazkur zikr yan nahin saum-o-salat ka

kya 'mir' tujh ko nama-syahi ka fikr hai

KHatm-e-rusul sa shaKHs hai zamin najat ka