haram ki rah mein sunte hain ek but-KHana aata hai

haram kī raah meñ sunte haiñ ik but-ḳhāna aatā hai

usī manzil pe shāyad dost kā kāshāna aatā hai

ba-sū-e-mai-kada jab bhī koī mastāna aatā hai

surāhī jhūmtī hai vajd meñ paimāna aatā hai

ye hālat ho ga.ī apnī junūñ meñ in dinoñ hamdam

vahīñ manzil banātā huuñ jahāñ vīrāna aatā hai

na jaane haal kyā hogā mirī majbūr tauba kā

machal jaatā hai dil jab sāmne paimāna aatā hai

machāyā shor zanjīroñ ne yaksū ho ga.e aadā

ajab andāz se zālim tirā dīvāna aatā hai

hai dil bechain kuchh bad-zauqī-e-ahbāb se varna

'zafar' mazmūn le kar bazm meñ shāhāna aatā hai

haram ki rah mein sunte hain ek but-KHana aata hai

usi manzil pe shayad dost ka kashana aata hai

ba-su-e-mai-kada jab bhi koi mastana aata hai

surahi jhumti hai wajd mein paimana aata hai

ye haalat ho gai apni junun mein in dinon hamdam

wahin manzil banata hun jahan virana aata hai

na jaane haal kya hoga meri majbur tauba ka

machal jata hai dil jab samne paimana aata hai

machaya shor zanjiron ne yaksu ho gae aada

ajab andaz se zalim tera diwana aata hai

hai dil bechain kuchh bad-zauqi-e-ahbab se warna

'zafar' mazmun le kar bazm mein shahana aata hai