haram ko shaiKH mat ja hai but-e-dil-KHwah surat mein

haram ko shaiḳh mat jā hai but-e-dil-ḳhvāh sūrat meñ

agar hai mard-e-ma.anī dekh le allāh sūrat meñ

nazar kar us kī Tuk nairañgiyoñ par chashm-e-hairat se

kahīñ gul hai kahīñ kāñTā kahīñ hai kaah sūrat meñ

sanam kī satr-e-abrū kātib-e-qudrat ne likhī hai

kalīd-e-ilm-e-ma.anī hai ye bismillāh sūrat meñ

subū-o-jām par kam-zarf karte haiñ nazar varna

bane haiñ ek miTTī ke gadā o shaah sūrat meñ

mirā vo tifl-e-abjad-ḳhvāñ paḌhe kyūñkar na ab hijje

baġhair is qā.ede ke ho sake kab raah sūrat meñ

judā dīvār se kab taaq hai koī batāo to

dikhā.ī de hai pur-ahvāl ko do ik maah sūrat meñ

kar apne dil ko saiqal ai sikandar tā ho ye raushan

safā se aa.ine ke kab ḳhalal hai aah sūrat meñ

gayā hogā taraf ka.aba kī jo mahram nahīñ us se

ki haajī us ke aamad raft kī hai raah sūrat meñ

'nasīr' us kī zaqan meñ band hai vo yūsuf-e-kan.āñ

nikaltī hai azīzo dekh lo kyā chaah sūrat meñ

haram ko shaiKH mat ja hai but-e-dil-KHwah surat mein

agar hai mard-e-mani dekh le allah surat mein

nazar kar us ki Tuk nairangiyon par chashm-e-hairat se

kahin gul hai kahin kanTa kahin hai kah surat mein

sanam ki satr-e-abru katib-e-qudrat ne likhi hai

kalid-e-ilm-e-mani hai ye bismillah surat mein

subu-o-jam par kam-zarf karte hain nazar warna

bane hain ek miTTi ke gada o shah surat mein

mera wo tifl-e-abjad-KHwan paDhe kyunkar na ab hijje

baghair is qaede ke ho sake kab rah surat mein

juda diwar se kab taq hai koi batao to

dikhai de hai pur-ahwal ko do ek mah surat mein

kar apne dil ko saiqal ai sikandar ta ho ye raushan

safa se aaine ke kab KHalal hai aah surat mein

gaya hoga taraf kaba ki jo mahram nahin us se

ki haji us ke aamad raft ki hai rah surat mein

'nasir' us ki zaqan mein band hai wo yusuf-e-kanan

nikalti hai azizo dekh lo kya chah surat mein