حرم میں کوئی جلوہ تم نہ بت خانے میں رکھ دینا

حرم میں کوئی جلوہ تم نہ بت خانے میں رکھ دینا

یہ سرمایہ ہے دل کا دل کے کاشانے میں رکھ دینا

اگر منظور کیف نو ہو بت خانے میں رکھ دینا

تو گردش چشم بادہ گوں کی پیمانے میں رکھ دینا

تبسم لب کا ہستی آنکھ کی عارض کی رنگینی

یہ گلدستہ ہے یہ بھی دل کے کاشانے میں رکھ دینا

نشانی ہے یہ جیتی جاگتی خون تمنا کی

یہی عنوان میرے بعد افسانے میں رکھ دینا

فضائے دہر کو مست و منور جس نے رکھا ہے

سمٹ جائے یہ رعنائی تو پیمانے میں رکھ دینا

مری اک اک تڑپ آئینۂ درد محبت ہو

کوئی ایسا بھی پہلو دل کے تڑپانے میں رکھ دینا

کہے کون ان سے ظاہرؔ ایک بجلی اپنے جلوؤں کی

ہمارے تیرہ و تاریک کاشانے میں رکھ دینا