haram mein koi jalwa tum na but-KHane mein rakh dena

haram meñ koī jalva tum na but-ḳhāne meñ rakh denā

ye sarmāya hai dil kā dil ke kāshāne meñ rakh denā

agar manzūr kaif-e-nau ho but-ḳhāne meñ rakh denā

to gardish chashm-e-bāda-gūñ kī paimāne meñ rakh denā

tabassum lab kā hastī aañkh kī 'āriz kī rangīnī

ye guldasta hai ye bhī dil ke kāshāne meñ rakh denā

nishānī hai ye jiitī jāgtī ḳhūn-e-tamannā kī

yahī 'unvān mere baa'd afsāne meñ rakh denā

fazā-e-dahr ko mast-o-munavvar jis ne rakkhā hai

simaT jaa.e ye rā'nā.ī to paimāne meñ rakh denā

mirī ik ik taḌap ā.īna-e-dard-e-mohabbat ho

koī aisā bhī pahlū dil ke taḌpāne meñ rakh denā

kahe kaun un se 'zāhir' ek bijlī apne jalvoñ kī

hamāre tīra-o-tārīk kāshāne meñ rakh denā

haram mein koi jalwa tum na but-KHane mein rakh dena

ye sarmaya hai dil ka dil ke kashane mein rakh dena

agar manzur kaif-e-nau ho but-KHane mein rakh dena

to gardish chashm-e-baada-gun ki paimane mein rakh dena

tabassum lab ka hasti aankh ki 'ariz ki rangini

ye guldasta hai ye bhi dil ke kashane mein rakh dena

nishani hai ye jiti jagti KHun-e-tamanna ki

yahi 'unwan mere ba'd afsane mein rakh dena

faza-e-dahr ko mast-o-munawwar jis ne rakkha hai

simaT jae ye ra'nai to paimane mein rakh dena

meri ek ek taDap aaina-e-dard-e-mohabbat ho

koi aisa bhi pahlu dil ke taDpane mein rakh dena

kahe kaun un se 'zahir' ek bijli apne jalwon ki

hamare tira-o-tarik kashane mein rakh dena