haram-o-dair mein humne ye tamasha dekha

haram-o-dair meñ ham ne ye tamāshā dekhā

ya.anī har ghar meñ usī yaad kā jalva dekhā

ik tumheñ chāhne vaale nahīñ ai shaiḳh-e-haram

barhaman ko bhī usī shoḳh kā shaidā dekhā

kū-ba-kū chāk-garebān jo phirā karte ho

dil lagāne kā zamāne meñ natīja dekhā

na tabī.at kabhī badlī na nigāheñ un kī

ham ne har roz zamāne ko badaltā dekhā

kis liye aaj pareshāñ huā jaatā hai tū

kyā mirā zaḳhm-e-jigar tū ne masīhā dekhā

tāb-e-nazāra na thī jab to ga.e kyoñ muusā

aap ne had se guzarne kā natīja dekhā

suniye suniye ki huiiñ haiñ mirī maḳhmūr āñkheñ

aap ke sar kī qasam aap kā jalva dekhā

vaah kyā ḳhuub vo nārāz hue ruuTh ga.e

merā chehra jo dam-e-arz-e-tamanna dekhā

ham to maqtal meñ jigar thaam ke taḌpe lekin

tum ne kis tarah se bismil kā taḌapnā dekhā

josh-e-vahshat mujhe sahrā kī taraf le aaya

aur aage jo baḌhe dāman-e-dariyā dekhā

shoḳh dil shoḳh tabī.at kā hai insāñ 'sanjar'

is ko har-vaqt hasīnoñ hī pe shaidā dekhā

haram-o-dair mein hum ne ye tamasha dekha

yani har ghar mein usi yaad ka jalwa dekha

ek tumhein chahne wale nahin ai shaiKH-e-haram

barhaman ko bhi usi shoKH ka shaida dekha

ku-ba-ku chaak-gareban jo phira karte ho

dil lagane ka zamane mein natija dekha

na tabiat kabhi badli na nigahen un ki

hum ne har roz zamane ko badalta dekha

kis liye aaj pareshan hua jata hai tu

kya mera zaKHm-e-jigar tu ne masiha dekha

tab-e-nazara na thi jab to gae kyon musa

aap ne had se guzarne ka natija dekha

suniye suniye ki huin hain meri maKHmur aankhen

aap ke sar ki qasam aap ka jalwa dekha

wah kya KHub wo naraaz hue ruTh gae

mera chehra jo dam-e-arz-e-tamanna dekha

hum to maqtal mein jigar tham ke taDpe lekin

tum ne kis tarah se bismil ka taDapna dekha

josh-e-wahshat mujhe sahra ki taraf le aaya

aur aage jo baDhe daman-e-dariya dekha

shoKH dil shoKH tabiat ka hai insan 'sanjar'

is ko har-waqt hasinon hi pe shaida dekha