hare-bhare mausam ka manzar suraj ke us par bhi hai

hare-bhare mausam kā manzar sūraj ke us paar bhī hai

bādal dariyā aur samundar sūraj ke us paar bhī hai

ufuq kī us jānib se bhī kuchh shor sunā.ī detā hai

āvāzoñ kā koī lashkar sūraj ke us paar bhī hai

gautam nānak sā.īñ jaise fikr ke logoñ kī ḳhātir

raushan koī dhartī ambar sūraj ke us paar bhī hai

jin kā hai parvāz se rishta aise parindoñ se pūchho

duur kahīñ ik arz-e-munavvar sūraj ke us paar bhī hai

ḳhvāb kī kā.enāt meñ dekhā ham ne kal ye manzar bhī

raushnī dene vaalā patthar sūraj ke us paar bhī hai

añdhiyārā to fikr kā paikar hai sach kī tasvīr nahīñ

tāroñ kī bārāt kā mehvar sūraj ke us paar bhī hai

jīvan kā ye khel tamāsha yahīñ talak hai nahīñ 'mirāq'

ham sab kī ḳhātir koī ghar sūraj ke us paar bhī hai

hare-bhare mausam ka manzar suraj ke us par bhi hai

baadal dariya aur samundar suraj ke us par bhi hai

ufuq ki us jaanib se bhi kuchh shor sunai deta hai

aawazon ka koi lashkar suraj ke us par bhi hai

gautam nanak sain jaise fikr ke logon ki KHatir

raushan koi dharti ambar suraj ke us par bhi hai

jin ka hai parwaz se rishta aise parindon se puchho

dur kahin ek arz-e-munawwar suraj ke us par bhi hai

KHwab ki kaenat mein dekha hum ne kal ye manzar bhi

raushni dene wala patthar suraj ke us par bhi hai

andhiyara to fikr ka paikar hai sach ki taswir nahin

taron ki baraat ka mehwar suraj ke us par bhi hai

jiwan ka ye khel tamasha yahin talak hai nahin 'miraq'

hum sab ki KHatir koi ghar suraj ke us par bhi hai