hare mausam khilenge sona ban ke KHak badlegi

hare mausam khileñge sonā ban ke ḳhaak badlegī

kahāñ tak ye zamīñ āḳhir na.ī poshāk badlegī

hasīñ ma.asūm hoñToñ par mohabbat ke sabaq taaza

kabhī to aadmī kī fitrat-e-chālāk badlegī

ravāñ hai āb-o-ḳhūñ sar pattharoñ ko phoḌne diije

nadī sailāb kī rau meñ ḳhas-o-ḳhāshāk badlegī

salīqa zindagī kī vahshatoñ ko milne vaalā hai

qabā us kī yaqīnan dāman-e-sad-chāk badlegī

chhabaktī shabnamīñ āñkhoñ meñ najm-o-gul ke afsāne

na.ī karvaT abhī shāyad hamārī ḳhaak badlegī

dhule kapḌoñ pe dāġh-e-ḳhushbū rañg-e-zindagī raushan

tirī qurbat se dil kī sar-zamīn-e-pāk badlegī

hare mausam khilenge sona ban ke KHak badlegi

kahan tak ye zamin aaKHir nai poshak badlegi

hasin masum honTon par mohabbat ke sabaq taza

kabhi to aadmi ki fitrat-e-chaalak badlegi

rawan hai aab-o-KHun sar pattharon ko phoDne dije

nadi sailab ki rau mein KHas-o-KHashak badlegi

saliqa zindagi ki wahshaton ko milne wala hai

qaba us ki yaqinan daman-e-sad-chaak badlegi

chhabakti shabnamin aankhon mein najm-o-gul ke afsane

nai karwaT abhi shayad hamari KHak badlegi

dhule kapDon pe dagh-e-KHushbu rang-e-zindagi raushan

teri qurbat se dil ki sar-zamin-e-pak badlegi