hare shajar na sahi KHushk ghas rahne do

hare shajar na sahī ḳhushk ghaas rahne do

zamīñ ke jism pe koī libās rahne do

maiñ zindagī kī kaḌī dhuup meñ akelā huuñ

fareb-e-abr mire ās-pās rahne do

aziyyateñ hī mohabbat kī ruuh hotī haiñ

mire vajūd meñ itnī sī aas rahne do

koī kiran mirī ummīd kī nahīñ baaqī

mire ḳhayāloñ meñ tasvīr-e-yās rahne do

hamārī pyaas kabhī to koī bujhā.egā

larazte hāthoñ meñ ḳhālī gilās rahne do

maiñ ek gulshan-e-be-rañg huuñ ḳhudā ke liye

mirī fazā meñ umīdoñ kī baas rahne do

hare shajar na sahi KHushk ghas rahne do

zamin ke jism pe koi libas rahne do

main zindagi ki kaDi dhup mein akela hun

fareb-e-abr mere aas-pas rahne do

aziyyaten hi mohabbat ki ruh hoti hain

mere wajud mein itni si aas rahne do

koi kiran meri ummid ki nahin baqi

mere KHayalon mein taswir-e-yas rahne do

hamari pyas kabhi to koi bujhaega

larazte hathon mein KHali gilas rahne do

main ek gulshan-e-be-rang hun KHuda ke liye

meri faza mein umidon ki bas rahne do