harf-e-be-matlab ki maine kis qadar tafsir ki

harf-e-be-matlab kī maiñ ne kis qadar tafsīr kī

shakl pahchānī ga.ī phir bhī na is tasvīr kī

sub.h kā darvāza khulte hī chalo gulshan kī samt

rañg uḌ jā.egā phūloñ kā agar tāḳhīr kī

qaid mere jism ke andar koī vahshī na ho

saañs letā huuñ to aatī hai sadā zanjīr kī

tere chehre par jo likkhā thā mirī āñkhoñ meñ hai

hifz hai mujh ko ibārat ab bhī us tahrīr kī

tujh ko dekhā bhī nahīñ lekin terī ḳhvāhish bhī hai

ret kī dīvār sat.h-e-āb par ta.amīr kī

ghar kī vīrānī dar-o-dīvār ke andar rahī

maiñ ne apne dard ko mohlat na dī tash.hīr kī

maiñ ne lauh-e-arsh par likkhā huā sab paḌh liyā

lā mirī āñkhoñ meñ miTTī de mirī taqdīr kī

mehr-o-mah lagte haiñ apne jism ke zarre mujhe

sochtā huuñ kaun sī manzil hai ye tasḳhīr kī

luT chuke vo haath shāhid jin se māñgī thī duā

haañ abhī tak hai fazāoñ meñ mahak tāsīr kī

harf-e-be-matlab ki main ne kis qadar tafsir ki

shakl pahchani gai phir bhi na is taswir ki

subh ka darwaza khulte hi chalo gulshan ki samt

rang uD jaega phulon ka agar taKHir ki

qaid mere jism ke andar koi wahshi na ho

sans leta hun to aati hai sada zanjir ki

tere chehre par jo likkha tha meri aankhon mein hai

hifz hai mujh ko ibarat ab bhi us tahrir ki

tujh ko dekha bhi nahin lekin teri KHwahish bhi hai

ret ki diwar sath-e-ab par tamir ki

ghar ki virani dar-o-diwar ke andar rahi

main ne apne dard ko mohlat na di tashhir ki

main ne lauh-e-arsh par likkha hua sab paDh liya

la meri aankhon mein miTTi de meri taqdir ki

mehr-o-mah lagte hain apne jism ke zarre mujhe

sochta hun kaun si manzil hai ye tasKHir ki

luT chuke wo hath shahid jin se mangi thi dua

han abhi tak hai fazaon mein mahak tasir ki