harf-e-isbaat ki taqlid se aaghaz kiya

harf-e-isbāt kī taqlīd se āġhāz kiyā

sub.h kā raat pe tanqīd se āġhāz kiyā

sher-goī ke safar kā miyāñ nāseh ham ne

apne afkār kī tajdīd se āġhāz kiyā

jo pas-o-pesh ki sochūñ to laraz jaatā huuñ

us kī tarjīh ne tardīd se āġhāz kiyā

dekhtā kyā hai mirā shauq-e-junūñ maiñ ne to

apne har din kā tirī diid se āġhāz kiyā

arz-e-hālāt ko tamhīd thī lāzim lekin

dil ke afsāne kā tākīd se āġhāz kiyā

maiñ marāsim kī shurūāt na kartā lekin

shoḳhī-e-chashm kī tā.īd se āġhāz kiyā

us kā sahrā-e-jahālat meñ bhaTaknā tai hai

jis ne nā-ahloñ kī taqlīd se āġhāz kiyā

āḳhirash ġham ke ḳhazāne hī mayassar aa.e

jab ḳhushī milne kī ummīd se āġhāz kiyā

'shād' ham sāhib-e-īmān haiñ ham ne apnī

ziist kā kalma-e-tauhīd se āġhāz kiyā

harf-e-isbaat ki taqlid se aaghaz kiya

subh ka raat pe tanqid se aaghaz kiya

sher-goi ke safar ka miyan naseh hum ne

apne afkar ki tajdid se aaghaz kiya

jo pas-o-pesh ki sochun to laraz jata hun

us ki tarjih ne tardid se aaghaz kiya

dekhta kya hai mera shauq-e-junun main ne to

apne har din ka teri did se aaghaz kiya

arz-e-haalat ko tamhid thi lazim lekin

dil ke afsane ka takid se aaghaz kiya

main marasim ki shuruat na karta lekin

shoKHi-e-chashm ki taid se aaghaz kiya

us ka sahra-e-jahaalat mein bhaTakna tai hai

jis ne na-ahlon ki taqlid se aaghaz kiya

aaKHirash gham ke KHazane hi mayassar aae

jab KHushi milne ki ummid se aaghaz kiya

'shad' hum sahib-e-iman hain hum ne apni

zist ka kalma-e-tauhid se aaghaz kiya