harf-e-muhmal hain kahan wird-e-zaban hote hain

harf-e-muhmal haiñ kahāñ vird-e-zabāñ hote haiñ

ham to bas hasb-e-zarūrat hī bayāñ hote haiñ

din meñ hote haiñ dahakte hue angāroñ se

shaam hotī hai to ham log dhuāñ hote haiñ

ham bhī kyā log haiñ khoī huī manzil ke liye

kisī bhaTkī huī kashtī se ravāñ hote haiñ

ham vo parvarda-e-ālām-e-zamāna haiñ ki jo

sāya-e-gardish-e-daurāñ meñ javāñ hote haiñ

ḳhuld meñ dahr sī lazzat nahīñ milne vaalī

ruuh meñ jism ke āsār kahāñ hote haiñ

ye kharoñcheñ hī to ismat kī dalīleñ haiñ 'safar'

paak jismoñ pe mohabbat ke nishāñ hote haiñ

harf-e-muhmal hain kahan wird-e-zaban hote hain

hum to bas hasb-e-zarurat hi bayan hote hain

din mein hote hain dahakte hue angaron se

sham hoti hai to hum log dhuan hote hain

hum bhi kya log hain khoi hui manzil ke liye

kisi bhaTki hui kashti se rawan hote hain

hum wo parwarda-e-alam-e-zamana hain ki jo

saya-e-gardish-e-dauran mein jawan hote hain

KHuld mein dahr si lazzat nahin milne wali

ruh mein jism ke aasar kahan hote hain

ye kharonchen hi to ismat ki dalilen hain 'safar'

pak jismon pe mohabbat ke nishan hote hain