harf ko phul banate hue itraati hun

harf ko phuul banāte hue itrātī huuñ

maiñ tujhe apnā batāte hue itrātī huuñ

sāhil-e-vaqt pe chalte hue dekhā tum ne

naqsh-e-pā apne banāte hue itrātī huuñ

hai koī ḳhvābcha kab se mirī uñglī thāme

maiñ use chalnā sikhāte hue itrātī huuñ

utar aatī haiñ mirī chhat pe hañstī rāteñ

aur maiñ chāñd uḌāte hue itrātī huuñ

anginat najm tah-e-jāñ meñ utar aate haiñ

aañkh kī putlī ghumāte hue itrātī huuñ

lahlahātā hai ḳhayāloñ meñ tumhārā chehra

aur maiñ haath lagāte hue itrātī huuñ

dhuup kī barkhā hai ye chhājoñ baras jaatī hai

der tak is meñ nahāte hue itrātī huuñ

kaise gulnār se ho jaate haiñ aariz mere

maiñ tire sāmne aate hue itrātī huuñ

chahchahātī haiñ ḳhayālāt kī chiḌiyāñ 'mahnāz'

dard kī fasl ugāte hue itrātī huuñ

harf ko phul banate hue itraati hun

main tujhe apna batate hue itraati hun

sahil-e-waqt pe chalte hue dekha tum ne

naqsh-e-pa apne banate hue itraati hun

hai koi KHwabcha kab se meri ungli thame

main use chalna sikhate hue itraati hun

utar aati hain meri chhat pe hansti raaten

aur main chand uDate hue itraati hun

anginat najm tah-e-jaan mein utar aate hain

aankh ki putli ghumate hue itraati hun

lahlahata hai KHayalon mein tumhaara chehra

aur main hath lagate hue itraati hun

dhup ki barkha hai ye chhajon baras jati hai

der tak is mein nahate hue itraati hun

kaise gulnar se ho jate hain aariz mere

main tere samne aate hue itraati hun

chahchahati hain KHayalat ki chiDiyan 'mahnaz'

dard ki fasl ugate hue itraati hun