harf se tasir lafzon se mani le gaya

harf se tāsīr lafzoñ se ma.anī le gayā

jaate jaate vo mirī jādū-bayānī le gayā

us se thiiñ mansūb jo yādeñ suhānī le gayā

chhīn kar mujh se sabhī apnī nishānī le gayā

shāh-rāh-e-zīst par mujh ko akelā chhoḌ kar

jaane vaalā mujh se lutf-e-zindagānī le gayā

mez par nanhā sā ik kāġhaz kā TukḌā chhoḌ kar

zindagī kī har ḳhushī vo nā-gahānī le gayā

ham udhar masrūf the aur vaqt kā sail-e-ravāñ

kyā patā kab chhīn kar ham se javānī le gayā

muddatoñ se sākit-o-jāmid hai ye nāyāb dil

kaun is dariyā kī maujoñ kī ravānī le gayā

harf se tasir lafzon se mani le gaya

jate jate wo meri jadu-bayani le gaya

us se thin mansub jo yaaden suhani le gaya

chhin kar mujh se sabhi apni nishani le gaya

shah-rah-e-zist par mujh ko akela chhoD kar

jaane wala mujh se lutf-e-zindagani le gaya

mez par nanha sa ek kaghaz ka TukDa chhoD kar

zindagi ki har KHushi wo na-gahani le gaya

hum udhar masruf the aur waqt ka sail-e-rawan

kya pata kab chhin kar hum se jawani le gaya

muddaton se sakit-o-jamid hai ye nayab dil

kaun is dariya ki maujon ki rawani le gaya