harf shīrīñ haiñ magar lahja hai nashtar jaisā
vaz.a phūloñ sī hai kirdār hai patthar jaisā
jis pe Thahrī hai nazar merī baḌī mushkil se
kaash andar se bhī vo shaḳhs ho bāhar jaisā
ruuh meñ ho chukā tahlīl mirā har unsur
jism kyā hai faqat ik zāhirī paikar jaisā
narm aisā hai ki milte hī pighal jaatā hai
aur chhū liije to ho jaa.e hai patthar jaisā
tujh meñ nadiyoñ kī tarah maujeñ na hoñgī ik din
maiñ bhī ho jā.ūñgā ḳhāmosh samundar jaisā
laakh jhūTā sahī ma.abūd to ban jaatā hai
jis kī taqdīr meñ fankār ho aazar jaisā
shor nadiyoñ kī tarah vo kabhī karte hī nahīñ
hausla rakhte haiñ jo log samundar jaisā
vaqt kā koī ḳhudā us ko jhukā saktā nahīñ
ḳhuun meñ jis ke ho jauhar koī jauhar jaisā
harf shirin hain magar lahja hai nashtar jaisa
waza phulon si hai kirdar hai patthar jaisa
jis pe Thahri hai nazar meri baDi mushkil se
kash andar se bhi wo shaKHs ho bahar jaisa
ruh mein ho chuka tahlil mera har unsur
jism kya hai faqat ek zahiri paikar jaisa
narm aisa hai ki milte hi pighal jata hai
aur chhu lije to ho jae hai patthar jaisa
tujh mein nadiyon ki tarah maujen na hongi ek din
main bhi ho jaunga KHamosh samundar jaisa
lakh jhuTa sahi mabud to ban jata hai
jis ki taqdir mein fankar ho aazar jaisa
shor nadiyon ki tarah wo kabhi karte hi nahin
hausla rakhte hain jo log samundar jaisa
waqt ka koi KHuda us ko jhuka sakta nahin
KHun mein jis ke ho jauhar koi jauhar jaisa
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.