حرف شیریں ہیں مگر لہجہ ہے نشتر جیسا

حرف شیریں ہیں مگر لہجہ ہے نشتر جیسا

وضع پھولوں سی ہے کردار ہے پتھر جیسا

جس پہ ٹھہری ہے نظر میری بڑی مشکل سے

کاش اندر سے بھی وہ شخص ہو باہر جیسا

روح میں ہو چکا تحلیل مرا ہر عنصر

جسم کیا ہے فقط اک ظاہری پیکر جیسا

نرم ایسا ہے کہ ملتے ہی پگھل جاتا ہے

اور چھو لیجے تو ہو جائے ہے پتھر جیسا

تجھ میں ندیوں کی طرح موجیں نہ ہوں گی اک دن

میں بھی ہو جاؤں گا خاموش سمندر جیسا

لاکھ جھوٹا سہی معبود تو بن جاتا ہے

جس کی تقدیر میں فن کار ہو آذر جیسا

شور ندیوں کی طرح وہ کبھی کرتے ہی نہیں

حوصلہ رکھتے ہیں جو لوگ سمندر جیسا

وقت کا کوئی خدا اس کو جھکا سکتا نہیں

خون میں جس کے ہو جوہر کوئی جوہر جیسا