harf su-e-lab-e-izhaar nikal hi aaya

harf sū-e-lab-e-iz.hār nikal hī aaya

ḳhāna-e-qaid se ayyār nikal hī aaya

dastakoñ meñ vahī andāz thā vaqfa thā vahī

halqa-e-dard se bīmār nikal hī aaya

pūchhne aaya hai vo āḳhirī ḳhvāhish merī

āḳhirash mauqa-e-iz.hār nikal hī aaya

tang thā lamha-e-ishrat kī rajaz-ḳhvānī se

ġham sañbhāle hue talvār nikal hī aaya

raḳhna-andāz huī shorish-e-zanjīr bahut

phir bhī maiñ toḌ ke dīvār nikal hī aaya

sochte hī nahīñ arbāb-e-junūñ is ke sivā

zikr-e-la.al-e-lab-o-ruḳhsār nikal hī aaya

maiñ na kahtā thā ki ho jā.eñgī āñkheñ patthar

aa.ina jānib-e-bāzār nikal hī aaya

shāḳh-e-gul tak thī ba-zāhir to koī rok na Tok

baḌh ga.e haath to ik ḳhaar nikal hī aaya

harf su-e-lab-e-izhaar nikal hi aaya

KHana-e-qaid se ayyar nikal hi aaya

dastakon mein wahi andaz tha waqfa tha wahi

halqa-e-dard se bimar nikal hi aaya

puchhne aaya hai wo aaKHiri KHwahish meri

aaKHirash mauqa-e-izhaar nikal hi aaya

tang tha lamha-e-ishrat ki rajaz-KHwani se

gham sanbhaale hue talwar nikal hi aaya

raKHna-andaz hui shorish-e-zanjir bahut

phir bhi main toD ke diwar nikal hi aaya

sochte hi nahin arbab-e-junun is ke siwa

zikr-e-lal-e-lab-o-ruKHsar nikal hi aaya

main na kahta tha ki ho jaengi aankhen patthar

aaina jaanib-e-bazar nikal hi aaya

shaKH-e-gul tak thi ba-zahir to koi rok na Tok

baDh gae hath to ek KHar nikal hi aaya