harf tum apni nazakat pe na lana hargiz

harf tum apnī nazākat pe na laanā hargiz

haath bedād-o-sitam se na uThānā hargiz

tum bhī chorī ko yaqīñ hai na kahoge achchhā

ab hameñ dekh ke āñkheñ na churānā hargiz

ishq hai ek magar āfat-e-nau hai har-dam

ye vo mazmūñ hai ki hogā na purānā hargiz

yahī andāz to haiñ dil ke uḌā lene ke

un kī tum nīchī nigāhoñ pe na jaanā hargiz

sabab-e-qatl-e-mohabbat hai agar ai zālim

to mirā jurm kisī ko na batānā hargiz

dil-e-ḳhūñ-gashta kā ho raaz na ifshā ai chashm

ashk-e-gul-rañg kā Tapkā na lagānā hargiz

huuñ tunak-zarf na jhelūñgā sharāb-e-pur-zor

parda yakbār na chehre se uThānā hargiz

ham se bīmār bhī jāñ-bar kahīñ hote haiñ masīh

tum yahāñ aa ke na taklīf uThānā hargiz

jins-e-nāyāb ke hote haiñ hazāroñ gāhak

tum patā apnā kisī ko na batānā hargiz

maiñ to kyā us se to muusā bhī na sar-bar aa.e

imtihānan hameñ jalva na dikhānā hargiz

jo chalā tīr-e-sitam dil se vo guzrā ai charḳh

terā ḳhālī na gayā koī nishānā hargiz

zikr barbādī-e-dehlī kā sunā kar hamdam

neshtar zaḳhm-e-kuhan par na lagānā hargiz

āb-e-rafta nahīñ phir bahr meñ phir kar aatā

dehlī ābād ho ye dhyān na laanā hargiz

vo to baaqī hī nahīñ jin se ki dehlī thī murād

dhokā ab naam pe dehlī ke na khānā hargiz

getī-afroz agar hazrat-e-nayyar rahte

itnā tārīk to hotā na zamānā hargiz

ab to ye shahr hai ik qālib-e-be-jāñ hamdam

kuchh yahāñ rahne kī ḳhushiyāñ na manānā hargiz

dar-e-mai-ḳhāna huā band sadā ye hai buland

yaañ harīfān-e-qadah-ḳhvār na aanā hargiz

allāh allāh vo navvāb-e-ulā.ī ke kalām

jin se rañgīñ nahīñ bulbul kā tarānā hargiz

tū to hai 'anvar'-o-'maikash' kī judā.ī kā nishāñ

dil-e-pur-dard se ai daaġh na jaanā hargiz

saut-e-bulbul taraf-añgez sahī par hamdam

dard farsūda diloñ ko na sunānā hargiz

maiñ huuñ ik majma-e-ahbāb kā bichhḌā gulchīñ

mujh ko gul-dasta-e-rañgīñ na dikhānā hargiz

jam.a hai majma-e-ahbāb fazā meñ terī

ai tasavvur ye muraqqa.a na miTānā hargiz

dil meñ haiñ hasrat-o-andoh ke ambār lage

itnā yakjā na kahīñ hogā ḳhazānā hargiz

sāqī-e-bazm tirī tarz-e-taġhāful ke nisār

durd-e-mai kā bhī idhar jaam na laanā hargiz

qahr lā.eñge ye tāle.a jo zarā bhī chete

ai falak ḳhvāb se un ko na jagānā hargiz

mahfil-e-aish se gar haz ho uThānā ai dost

ham se āzurda-diloñ ko na bulānā hargiz

dār-e-fānī meñ na kar fikr-e-qayām ai nādāñ

guzar-e-sail hai yaañ ghar na banānā hargiz

jin ke aivān the ham-palla-e-qasr-e-qaisar

un kī miltā nahīñ qabroñ kā Thikānā hargiz

vo ga.e din jo chaman-zār meñ dil lagtā thā

sach hai yaksāñ nahīñ rahtā hai zamānā hargiz

ham-safīrān-e-chaman sab hue garm-e-parvāz

ab ḳhush aatā nahīñ gulzār meñ jaanā hargiz

zaġhan-o-zāġh kī gulshan meñ sadā hai har sū

murġh-e-ḳhush-naġhma na āvāz sunānā hargiz

qasr-e-hālī ke havālī meñ zarā tum 'majrūh'

apnī DeḌh iiñT kī masjid na banānā hargiz

harf tum apni nazakat pe na lana hargiz

hath bedad-o-sitam se na uThana hargiz

tum bhi chori ko yaqin hai na kahoge achchha

ab hamein dekh ke aankhen na churana hargiz

ishq hai ek magar aafat-e-nau hai har-dam

ye wo mazmun hai ki hoga na purana hargiz

yahi andaz to hain dil ke uDa lene ke

un ki tum nichi nigahon pe na jaana hargiz

sabab-e-qatl-e-mohabbat hai agar ai zalim

to mera jurm kisi ko na batana hargiz

dil-e-KHun-gashta ka ho raaz na ifsha ai chashm

ashk-e-gul-rang ka Tapka na lagana hargiz

hun tunak-zarf na jhelunga sharab-e-pur-zor

parda yakbar na chehre se uThana hargiz

hum se bimar bhi jaan-bar kahin hote hain masih

tum yahan aa ke na taklif uThana hargiz

jins-e-nayab ke hote hain hazaron gahak

tum pata apna kisi ko na batana hargiz

main to kya us se to musa bhi na sar-bar aae

imtihanan hamein jalwa na dikhana hargiz

jo chala tir-e-sitam dil se wo guzra ai charKH

tera KHali na gaya koi nishana hargiz

zikr barbaadi-e-dehli ka suna kar hamdam

neshtar zaKHm-e-kuhan par na lagana hargiz

aab-e-rafta nahin phir bahr mein phir kar aata

dehli aabaad ho ye dhyan na lana hargiz

wo to baqi hi nahin jin se ki dehli thi murad

dhoka ab nam pe dehli ke na khana hargiz

geti-afroz agar hazrat-e-nayyar rahte

itna tarik to hota na zamana hargiz

ab to ye shahr hai ek qalib-e-be-jaan hamdam

kuchh yahan rahne ki KHushiyan na manana hargiz

dar-e-mai-KHana hua band sada ye hai buland

yan harifan-e-qadah-KHwar na aana hargiz

allah allah wo nawwab-e-ulai ke kalam

jin se rangin nahin bulbul ka tarana hargiz

tu to hai 'anwar'-o-'maikash' ki judai ka nishan

dil-e-pur-dard se ai dagh na jaana hargiz

saut-e-bulbul taraf-angez sahi par hamdam

dard farsuda dilon ko na sunana hargiz

main hun ek majma-e-ahbab ka bichhDa gulchin

mujh ko gul-dasta-e-rangin na dikhana hargiz

jama hai majma-e-ahbab faza mein teri

ai tasawwur ye muraqqa na miTana hargiz

dil mein hain hasrat-o-andoh ke ambar lage

itna yakja na kahin hoga KHazana hargiz

saqi-e-bazm teri tarz-e-taghaful ke nisar

durd-e-mai ka bhi idhar jam na lana hargiz

qahr laenge ye talea jo zara bhi chete

ai falak KHwab se un ko na jagana hargiz

mahfil-e-aish se gar haz ho uThana ai dost

hum se aazurda-dilon ko na bulana hargiz

dar-e-fani mein na kar fikr-e-qayam ai nadan

guzar-e-sail hai yan ghar na banana hargiz

jin ke aiwan the ham-palla-e-qasr-e-qaisar

un ki milta nahin qabron ka Thikana hargiz

wo gae din jo chaman-zar mein dil lagta tha

sach hai yaksan nahin rahta hai zamana hargiz

ham-safiran-e-chaman sab hue garm-e-parwaz

ab KHush aata nahin gulzar mein jaana hargiz

zaghan-o-zagh ki gulshan mein sada hai har su

murgh-e-KHush-naghma na aawaz sunana hargiz

qasr-e-haali ke hawali mein zara tum 'majruh'

apni DeDh inT ki masjid na banana hargiz