hari thi shaKH to baiTha na us pe panchhi kyun

harī thī shāḳh to baiThā na us pe panchhī kyuuñ

lage hai ujḌe hue ḳhvāb sī ye bastī kyuuñ

mujhe ḳhabar hai mire ghar meñ saañp āñkheñ haiñ

vagarna ġham ke ḳhazīne chhupā ke rakhtī kyuuñ

tumhī se tohmat-e-ālam ko nisbateñ mausūm

tumheñ ko kahte haiñ sab log sab se achchhī kyuuñ

ḳhizāñ ko mere hī ḳhvāboñ ke naam kyuuñ likkhā

zamīñ ne apnī ye daulat mujhī ko sauñpī kyuuñ

mirā vajūd bhī kyā kuchh ḳhudā se miltā hai

savāl-e-shak se hai begāna merī hastī kyuuñ

ye ashk silsila-e-jāñ ke bolte lab haiñ

chhupā ke daulat-e-nāyāb tum ne rakkhī kyuuñ

vajūd apnā kise kab aziiz thā 'nāhīd'

huī hai shaam se pahle hī shaam gahrī kyuuñ

hari thi shaKH to baiTha na us pe panchhi kyun

lage hai ujDe hue KHwab si ye basti kyun

mujhe KHabar hai mere ghar mein sanp aankhen hain

wagarna gham ke KHazine chhupa ke rakhti kyun

tumhi se tohmat-e-alam ko nisbaten mausum

tumhein ko kahte hain sab log sab se achchhi kyun

KHizan ko mere hi KHwabon ke nam kyun likkha

zamin ne apni ye daulat mujhi ko saunpi kyun

mera wajud bhi kya kuchh KHuda se milta hai

sawal-e-shak se hai begana meri hasti kyun

ye ashk silsila-e-jaan ke bolte lab hain

chhupa ke daulat-e-nayab tum ne rakkhi kyun

wajud apna kise kab aziz tha 'nahid'

hui hai sham se pahle hi sham gahri kyun