harif-e-shewa-e-arbab-e-gulsitan na hua

harīf-e-sheva-e-arbāb-e-gulsitāñ na huā

fareb-ḳhurda-e-rangīnī-e-jahāñ na huā

tamām 'umr rahā maiñ jahāñ se begāna

ḳhudā-gavāh ki shaidā-e-īn-o-āñ na huā

hazār nutq ne dī dād-e-husn-e-goyā.ī

magar fasāna-e-ulfat kabhī bayāñ na huā

rumūz-o-kuhna-haqīqat se hotā kyā vāqif

vo ḳhud farosh jo apnā bhī rāzdāñ na huā

nigāh-e-sāqī-e-anjām-bīñ ke maiñ qurbāñ

ki utrā nashsha-e-hastī to sargirāñ na huā

hazār rang meñ dekhā nazar-navāz jahāñ

magar maiñ shāhid-e-fitrat se bad-gumāñ na huā

adā kiyā na kabhī 'rāz' shukr-e-goyā.ī

zabāñ-darāz tū fitrat kā ham-zabāñ na huā

harif-e-shewa-e-arbab-e-gulsitan na hua

fareb-KHurda-e-rangini-e-jahan na hua

tamam 'umr raha main jahan se begana

KHuda-gawah ki shaida-e-in-o-an na hua

hazar nutq ne di dad-e-husn-e-goyai

magar fasana-e-ulfat kabhi bayan na hua

rumuz-o-kuhna-haqiqat se hota kya waqif

wo KHud farosh jo apna bhi raazdan na hua

nigah-e-saqi-e-anjam-bin ke main qurban

ki utra nashsha-e-hasti to sargiran na hua

hazar rang mein dekha nazar-nawaz jahan

magar main shahid-e-fitrat se bad-guman na hua

ada kiya na kabhi 'raaz' shukr-e-goyai

zaban-daraaz tu fitrat ka ham-zaban na hua