حریفو ہوش میں آؤ کہ جام شیشے کا

حریفو ہوش میں آؤ کہ جام شیشے کا

کسی کے لب کو ہے لایا پیام شیشے کا

دلوں کو مست نہ لٹکاتی زلف شانہ میں

کیا ہے سینے میں میں نے مقام شیشے کا

یہی نماز جماعت ہے رندوں کی زاہد

کہ جھکتے ہیں جھکے جس دم امام شیشے کا

تجھے سفال میسر نہ ہو لگا دے اوک

رواں ہو میکدے میں فیض عام شیشے کا

نکال مجھ کو نہ بزم شراب سے باہر

کہ تیرا بردہ ہوں ساقی غلام شیشے کا

بقدر ظرف مجھے دے شراب پیر مغاں

زبان حال سے یہ ہے کلام شیشے کا

ہزار سعی کرے زخم خوردہ ایک گزند

محال دل کی طرح التیام شیشے کا

وہی لطافت صورت وہی صفائے دروں

ہمارے دل میں ہے نقشہ تمام شیشے کا

نہ چھٹ سکے ترے قابو میں آ کے اے بدمست

لکیریں ہیں کف نازک میں دام شیشے کا

بلائے جاں تھی مجھے چال ہے تری ساقی

قیامت اور بھی لایا خرام شیشے کا