harifo hosh mein aao ki jam shishe ka

harīfo hosh meñ aao ki jaam shīshe kā

kisī ke lab ko hai laayā payām shīshe kā

diloñ ko mast na laTkātī zulf shāne meñ

kiyā hai siine meñ maiñ ne maqām shīshe kā

yahī namāz-e-jamā.at hai rindoñ kī zāhid

ki jhukte haiñ jhuke jis dam imaam shīshe kā

tujhe sifāl mayassar na ho lagā de ok

ravāñ ho mai-kade meñ faiz-e-ām shīshe kā

nikāl mujh ko na bazm-e-sharāb se bāhar

ki terā burda huuñ saaqī ġhulām shīshe kā

ba-qadr-e-zarf mujhe de sharāb pīr-e-muġhāñ

zabān-e-hāl se ye hai kalām shīshe kā

hazār sa.ī kare zaḳhm-ḳhurda ek gazand

muhāl dil kī tarah iltiyām shīshe kā

vahī latāfat-e-sūrat vahī safā-e-darūñ

hamāre dil meñ hai naqsha tamām shīshe kā

na chhuT sake tire qaabū meñ aa ke ai badmast

lakīreñ haiñ kaf-e-nāzuk meñ daam shīshe kā

balā-e-jāñ thī mujhe chaal he tirī saaqī

qayāmat aur bhī laayā ḳhirām shīshe kā

harifo hosh mein aao ki jam shishe ka

kisi ke lab ko hai laya payam shishe ka

dilon ko mast na laTkati zulf shane mein

kiya hai sine mein main ne maqam shishe ka

yahi namaz-e-jamaat hai rindon ki zahid

ki jhukte hain jhuke jis dam imam shishe ka

tujhe sifal mayassar na ho laga de ok

rawan ho mai-kade mein faiz-e-am shishe ka

nikal mujh ko na bazm-e-sharab se bahar

ki tera burda hun saqi ghulam shishe ka

ba-qadr-e-zarf mujhe de sharab pir-e-mughan

zaban-e-haal se ye hai kalam shishe ka

hazar sai kare zaKHm-KHurda ek gazand

muhaal dil ki tarah iltiyam shishe ka

wahi latafat-e-surat wahi safa-e-darun

hamare dil mein hai naqsha tamam shishe ka

na chhuT sake tere qabu mein aa ke ai badmast

lakiren hain kaf-e-nazuk mein dam shishe ka

bala-e-jaan thi mujhe chaal he teri saqi

qayamat aur bhi laya KHiram shishe ka