حریم دل کی طرف مہ رخاں نکل آئے

حریم دل کی طرف مہ رخاں نکل آئے

ہزاروں چاند سر آسماں نکل آئے

ہوائیں بھرنے لگیں خوشبوؤں کے پیمانے

جو چند پھول سر شاخ جاں نکل آئے

یہ خاص بات ملی عشق زادگاں میں ہمیں

کوئی بھی ذکر ہو ذکر بتاں نکل آئے

نہ وہ زمین نہ وہ آسماں نہ وہ شب و روز

خیال یار ہم آخر کہاں نکل آئے

کبھی کبھی گل و بلبل کی گفتگو بھی سنو

عجب نہیں کوئی طرز بیاں نکل آئے

کریدی جائے جو خاک دیار دل زدگاں

نوادرات کا گنج گراں نکل آئے

بھٹک رہی ہے اداسی ہماری شہر بہ شہر

کہیں تو کوچۂ زندہ دلاں نکل آئے

دھڑک رہا تھا جو سینے کی وسعتوں میں کہیں

اس ایک ذرے میں کتنے جہاں نکل آئے

سنا رہا تھا میں دیوار و در کو اپنی غزل

مگر وہاں تو کئی نکتہ داں نکل آئے

خیال ذہن سے کچھ اس طرح نکلتا ہے

بجھے چراغ سے جیسے دھواں نکل آئے

دبا سکے نہ تجسس کی آگ ہم یاورؔ

سنا پڑوس میں شور فغاں نکل آئے