harim-e-dil mein utarti hain aayaten uski

harīm-e-dil meñ utartī haiñ āyateñ us kī

lahū bhī karne lagā hai tilāvateñ us kī

qarīb thā to rag-e-jāñ se bhī qarīb rahā

bichhaḌ ke tā-ba-falak haiñ masāfateñ us kī

huī hai shāḳh-e-dil-o-jāñ pe ḳhvāhishoñ kī numū

lahū ke phuul khilā.eñgī qurbateñ us kī

isī umiid pe ḳhvāboñ kī fasl boī hai

ki kisht-e-dil meñ ugeñgī bashārateñ us kī

ḳhayāl rañg huā chāñdnī shafaq ḳhushbū

hazār rañg meñ dekhūñ maiñ sūrateñ us kī

numū-pazīr huuñ mujh ko na chhoḌ ai dhartī

mirī jaḌoñ ko abhī haiñ zarūrateñ us kī

lahū to jam gayā āñkhoñ kī putliyoñ meñ 'shakeb'

dikhā.eñ aks bhalā kyā basārteñ us kī

harim-e-dil mein utarti hain aayaten us ki

lahu bhi karne laga hai tilawaten us ki

qarib tha to rag-e-jaan se bhi qarib raha

bichhaD ke ta-ba-falak hain masafaten us ki

hui hai shaKH-e-dil-o-jaan pe KHwahishon ki numu

lahu ke phul khilaengi qurbaten us ki

isi umid pe KHwabon ki fasl boi hai

ki kisht-e-dil mein ugengi bashaaraten us ki

KHayal rang hua chandni shafaq KHushbu

hazar rang mein dekhun main suraten us ki

numu-pazir hun mujh ko na chhoD ai dharti

meri jaDon ko abhi hain zaruraten us ki

lahu to jam gaya aankhon ki putliyon mein 'shakeb'

dikhaen aks bhala kya basarten us ki