harim-e-dil pe Dali thi nazar ek sarsari humne

harīm-e-dil pe Daalī thī nazar ik sarsarī ham ne

javāb-e-barq-e-aiman thī jo dekhī raushnī ham ne

tire ġham kī badaulat yuuñ guzārī zindagī ham ne

uḌaa.ī zindagī bhar har musībat kī hañsī ham ne

kabhī mehr-o-mah-o-anjum ko bhī zulmat-nishāñ paayā

kabhī zarroñ meñ bhī dekhī tajallī tuur kī ham ne

miTā kar imtiyāz-e-rang-o-nasl-o-dīñ zamāne se

kiyā hai kis qadar ūñchā maqām-e-ādmī ham ne

yahāñ maujūd the sarv-o-saman bhī māh-o-anjum bhī

kamī mahsūs kī phir bhī barābar aap kī ham ne

agar rone pe baat aa.ī to hañs kar pī liye aañsū

baḌhā.ī is tarah aksar zamāne kī ḳhushī ham ne

namāz-o-bandagī ke go nahīñ pāband ham lekin

ḳhulūs-e-dil se kī hai jab bhī kī hai bandagī ham ne

nasheman ko lagā dī aag ḳhuud apne hī hāthoñ se

miTā.ī hai chaman kī yuuñ bhī aksar tīrgī ham ne

kisī shai kī nahīñ is meñ kamī yuuñ to magar yā-rab

tirī duniyā meñ paa.ī ek insāñ kī kamī ham ne

luTāyā zindagī sā gauhar-e-nāyāb bhī hañs kar

tirī ḳhātir na kī parvā salīb-o-dār kī ham ne

farozāñ kar ke sham'-e-dil zamāne ko ziyā baḳhshī

miTā.ī is tarah 'sābir' jahāñ se tīrgī ham ne

harim-e-dil pe Dali thi nazar ek sarsari hum ne

jawab-e-barq-e-aiman thi jo dekhi raushni hum ne

tere gham ki badaulat yun guzari zindagi hum ne

uDai zindagi bhar har musibat ki hansi hum ne

kabhi mehr-o-mah-o-anjum ko bhi zulmat-nishan paya

kabhi zarron mein bhi dekhi tajalli tur ki hum ne

miTa kar imtiyaz-e-rang-o-nasl-o-din zamane se

kiya hai kis qadar uncha maqam-e-admi hum ne

yahan maujud the sarw-o-saman bhi mah-o-anjum bhi

kami mahsus ki phir bhi barabar aap ki hum ne

agar rone pe baat aai to hans kar pi liye aansu

baDhai is tarah aksar zamane ki KHushi hum ne

namaz-o-bandagi ke go nahin paband hum lekin

KHulus-e-dil se ki hai jab bhi ki hai bandagi hum ne

nasheman ko laga di aag KHud apne hi hathon se

miTai hai chaman ki yun bhi aksar tirgi hum ne

kisi shai ki nahin is mein kami yun to magar ya-rab

teri duniya mein pai ek insan ki kami hum ne

luTaya zindagi sa gauhar-e-nayab bhi hans kar

teri KHatir na ki parwa salib-o-dar ki hum ne

farozan kar ke sham'-e-dil zamane ko ziya baKHshi

miTai is tarah 'sabir' jahan se tirgi hum ne