harim-e-dil se ya arsh-e-barin se

harīm-e-dil se yā arsh-e-barīñ se

tumheñ ham DhūñD lā.eñge kahīñ se

huā marne pe āġhāz-e-mohabbat

shurūa hotā hai ye qissa yahīñ se

bujhe dil kā charāġh ai sham.a-rū aaj

jalā de apne rū-e-ātishīñ se

jo us kī justujū meñ ghar se nikle

to ḳhud kho.e ga.e duniyā-o-dīñ se

mirī taqdīr aisī chāñdnī meñ

jo chamkegī to tum sī mah-jabīñ se

sadā us baam tak ab bhī na pahuñchī

pukār aa.e use arsh-e-barīñ se

falak se pahle hī kūche meñ un ke

nipaT lenā paḌā ham ko zamīñ se

chhupe chorī jo kuchh kartā hai zāhid

khulā raaz us kā us parda-nashīñ se

tirī añgḌā.iyāñ kahtī haiñ mujh se

tujhe kuchh milne vaalā hai kahīñ se

harim-e-dil se ya arsh-e-barin se

tumhein hum DhunD laenge kahin se

hua marne pe aaghaz-e-mohabbat

shurua hota hai ye qissa yahin se

bujhe dil ka charagh ai shama-ru aaj

jala de apne ru-e-atishin se

jo us ki justuju mein ghar se nikle

to KHud khoe gae duniya-o-din se

meri taqdir aisi chandni mein

jo chamkegi to tum si mah-jabin se

sada us baam tak ab bhi na pahunchi

pukar aae use arsh-e-barin se

falak se pahle hi kuche mein un ke

nipaT lena paDa hum ko zamin se

chhupe chori jo kuchh karta hai zahid

khula raaz us ka us parda-nashin se

teri angDaiyan kahti hain mujh se

tujhe kuchh milne wala hai kahin se