harim-e-zat ki har rut manae mere liye

harīm-e-zāt kī har rut manā.e mere liye

vo ro.e mere liye muskurā.e mere liye

zamāna us ko hamesha lagā.e zaḳhm pe zaḳhm

zamāna us ko hamesha satā.e mere liye

maiñ shahr chhoḌ ke jaane kī jab bhī baat karūñ

vo haath joḌ ke mujh ko manā.e mere liye

use kaho hai mohabbat meñ shirk kufr-e-azīm

vo apnā aap bhī ab bhuul jaa.e mere liye

qadam qadam pe jalātā rahūñ lahū ke charāġh

qadam qadam pe vo maqtal sajā.e mere liye

usī ko shauq thā sab se mujhe milāne kā

ab apnī aañkh kā kājal bahā.e mere liye

'na.īm' us ko zarūrat mirī kabhī na paḌe

vo milne aa.e mujhe to bas aa.e mere liye

harim-e-zat ki har rut manae mere liye

wo roe mere liye muskurae mere liye

zamana us ko hamesha lagae zaKHm pe zaKHm

zamana us ko hamesha satae mere liye

main shahr chhoD ke jaane ki jab bhi baat karun

wo hath joD ke mujh ko manae mere liye

use kaho hai mohabbat mein shirk kufr-e-azim

wo apna aap bhi ab bhul jae mere liye

qadam qadam pe jalata rahun lahu ke charagh

qadam qadam pe wo maqtal sajae mere liye

usi ko shauq tha sab se mujhe milane ka

ab apni aankh ka kajal bahae mere liye

'naim' us ko zarurat meri kabhi na paDe

wo milne aae mujhe to bas aae mere liye