haris ho na jahan mein na apna ji bhaTka

harīs ho na jahāñ meñ na apnā jī bhaTkā

zabāñ bigaḌ ga.ī gar us ko aa gayā chaTkā

jo shāhrāh gayā kuchh nahīñ huā khaTkā

bhaTak rahā hai musāfir huā jo oghaT kā

qabā pahante jo barham huā vo chust-qabā

diyā hai chīn-e-jabīñ ne bhī saath silvaT kā

yahāñ bhī ishva-e-ra.anā khaḌī lagātā hai

vo bahr-e-husn huā āshnā jo karvaT kā

hamārī vaz' se āshufta ho gayā majnūñ

hameñ jo najd ke ban meñ jinhoñ ne de paTkā

nazar huī hai pareshāñ hijāb meñ hai vo ruḳh

tilism khul nahīñ saktā hai un ke ghūñghaT kā

kiyā hai zulf-o-ruḳh-o-chashm ne jo sar-gashta

nikal ke ghar se mirā dil tirāhe meñ bhaTkā

kise hai taab jo dekhe nigāh-e-qahr-ālūd

koī udhar ko chalā aur koī idhar saTkā

hamāre ashk-e-musalsal zarā nahīñ rukte

ye ghaaT ḳhuub ravāñ ho rahā hai panghaT kā

hamārā rañg-e-tabī.ī hai sulh-e-kul mashrab

pasand ham ko nahīñ qāfiya bhī jhanjhaT kā

kaheñge 'sāqī'-e-sarmast sher-e-tar kyā ham

hamāre hisse meñ aayā hai jaam talchhaT kā

haris ho na jahan mein na apna ji bhaTka

zaban bigaD gai gar us ko aa gaya chaTka

jo shahrah gaya kuchh nahin hua khaTka

bhaTak raha hai musafir hua jo oghaT ka

qaba pahante jo barham hua wo chust-qaba

diya hai chin-e-jabin ne bhi sath silwaT ka

yahan bhi ishwa-e-rana khaDi lagata hai

wo bahr-e-husn hua aashna jo karwaT ka

hamari waz' se aashufta ho gaya majnun

hamein jo najd ke ban mein jinhon ne de paTka

nazar hui hai pareshan hijab mein hai wo ruKH

tilism khul nahin sakta hai un ke ghunghaT ka

kiya hai zulf-o-ruKH-o-chashm ne jo sar-gashta

nikal ke ghar se mera dil tirahe mein bhaTka

kise hai tab jo dekhe nigah-e-qahr-alud

koi udhar ko chala aur koi idhar saTka

hamare ashk-e-musalsal zara nahin rukte

ye ghaT KHub rawan ho raha hai panghaT ka

hamara rang-e-tabii hai sulh-e-kul mashrab

pasand hum ko nahin qafiya bhi jhanjhaT ka

kahenge 'saqi'-e-sarmast sher-e-tar kya hum

hamare hisse mein aaya hai jam talchhaT ka