hasb-e-maqsud ho gaya hun main

hasb-e-maqsūd ho gayā huuñ maiñ

raakh kā duud ho gayā huuñ maiñ

ek kamre talak basīrat hai

kitnā mahdūd ho gayā huuñ maiñ

naam pahle barā.e-nām to thā

ab to mafqūd ho gayā huuñ maiñ

yuuñ khiñche muflisī meñ sab rishte

jaise mardūd ho gayā huuñ maiñ

manfa.at bāñTtā rahā kal tak

aaj be-sūd ho gayā huuñ maiñ

shahr radd-o-qubūl meñ aa kar

būd-o-nābūd ho gayā huuñ maiñ

umr kī nā-rasā masāfat meñ

gard-ālūd ho gayā huuñ maiñ

huzn kī yaas kī vadī.at par

ain mas.ūd ho gayā huuñ maiñ

bāb-e-shahr-e-suḳhan huā thā 'alī'

nutq-e-masdūd ho gayā huuñ maiñ

hasb-e-maqsud ho gaya hun main

rakh ka dud ho gaya hun main

ek kamre talak basirat hai

kitna mahdud ho gaya hun main

nam pahle barae-nam to tha

ab to mafqud ho gaya hun main

yun khinche muflisi mein sab rishte

jaise mardud ho gaya hun main

manfat banTta raha kal tak

aaj be-sud ho gaya hun main

shahr radd-o-qubul mein aa kar

bud-o-nabud ho gaya hun main

umr ki na-rasa masafat mein

gard-alud ho gaya hun main

huzn ki yas ki wadiat par

ain masud ho gaya hun main

bab-e-shahr-e-suKHan hua tha 'ali'

nutq-e-masdud ho gaya hun main