hashr mein aur hi aasar nazar aate hain

hashr meñ aur hī āsār nazar aate haiñ

mere haamī shah-e-abrār nazar aate haiñ

dil-e-betāb ko ye kah ke sambhālā shab-e-ġham

Thahar ab sub.h ke āsār nazar aate haiñ

qalb-e-momin kī ajab shaan hai allāh allāh

sar jhukātā huuñ to anvār nazar aate haiñ

shab-e-asrā na rahā ek bhī parda haa.il

saaf haq ke unheñ dīdār nazar aate haiñ

dast-e-qudrat ne banā.ī hai vo sūrat terī

jis ke kaunain ḳharīdār nazar aate haiñ

chhup nahīñ sakte haiñ us parda nashīñ ke āshiq

ham ne dekhe haiñ sar-e-dār nazar aate haiñ

shāfe-e-hashr shafā.at pe kamar-basta hai

aaj har samt gunahgār nazar aate haiñ

faiz-e-sāqī se hai mai-ḳhāna-e-hastī ābād

aaj mai-ḳhvār hī mai-ḳhvār nazar aate haiñ

apne bātin ko na dekhā kabhī zāhid tū ne

ham to mai-ḳhvār haiñ mai-ḳhvār nazar aate haiñ

abr aate haiñ jo furqat meñ tirī ai saaqī

sūrat-e-dīda-e-ḳhūñbār nazar aate haiñ

ġhuncha-e-dil jo tire hijr meñ afsurda hai

baaġh meñ phuul mujhe ḳhaar nazar aate haiñ

maraz-e-ishq kī hālat koī ham se pūchhe

vo to achchhe haiñ jo bīmār nazar aate haiñ

haath ḳhālī hai magar dil to ġhanī hai apnā

chashm-e-maḳhlūq meñ zardār nazar aate haiñ

chhūT jā.eñge musībat se ab inshā-allāh

hijr meñ maut ke āsār nazar aate haiñ

Dagmagāte haiñ qadam rāh-e-vafā meñ mere

marhale ishq ke dushvār nazar aate haiñ

is qadar mahv rahe hirs-o-havā meñ 'rāsiḳh'

ab to sūrat se gunahgār nazar aate haiñ

hashr mein aur hi aasar nazar aate hain

mere hami shah-e-abrar nazar aate hain

dil-e-betab ko ye kah ke sambhaala shab-e-gham

Thahar ab subh ke aasar nazar aate hain

qalb-e-momin ki ajab shan hai allah allah

sar jhukata hun to anwar nazar aate hain

shab-e-asra na raha ek bhi parda hail

saf haq ke unhen didar nazar aate hain

dast-e-qudrat ne banai hai wo surat teri

jis ke kaunain KHaridar nazar aate hain

chhup nahin sakte hain us parda nashin ke aashiq

hum ne dekhe hain sar-e-dar nazar aate hain

shafe-e-hashr shafaat pe kamar-basta hai

aaj har samt gunahgar nazar aate hain

faiz-e-saqi se hai mai-KHana-e-hasti aabaad

aaj mai-KHwar hi mai-KHwar nazar aate hain

apne baatin ko na dekha kabhi zahid tu ne

hum to mai-KHwar hain mai-KHwar nazar aate hain

abr aate hain jo furqat mein teri ai saqi

surat-e-dida-e-KHunbar nazar aate hain

ghuncha-e-dil jo tere hijr mein afsurda hai

bagh mein phul mujhe KHar nazar aate hain

maraz-e-ishq ki haalat koi hum se puchhe

wo to achchhe hain jo bimar nazar aate hain

hath KHali hai magar dil to ghani hai apna

chashm-e-maKHluq mein zardar nazar aate hain

chhuT jaenge musibat se ab insha-allah

hijr mein maut ke aasar nazar aate hain

Dagmagate hain qadam rah-e-wafa mein mere

marhale ishq ke dushwar nazar aate hain

is qadar mahw rahe hirs-o-hawa mein 'rasiKH'

ab to surat se gunahgar nazar aate hain