hasin aur us pe KHud-bin wo sitam-gar yun bhi hai yun bhi

hasīn aur us pe ḳhud-bīñ vo sitam-gar yuuñ bhī hai yuuñ bhī

nazāra qabza-e-qudrat se bāhar yuuñ bhī hai yuuñ bhī

jau ye bismil hayā se hai to vo majrūh dekhe se

nigāh-e-nāz us qātil kī ḳhanjar yuuñ bhī hai yuuñ bhī

jabīñ us dar pe hai vo dar hai ūñchā arsh-e-a.azam se

buland auj-e-surayyā se muqaddar yuuñ bhī hai yuuñ bhī

idhar vo mujh se barham haiñ udhar māyūs-e-nazzāra

ki merī umr kā labrez sāġhar yuuñ bhī hai yuuñ bhī

aqīdat tujh se bhī hai bai.at-e-dast-e-subū bhī hai

jo saaqī riñd hai haqdār-e-kausar yuuñ bhī hai yuuñ bhī

mirī manzil kā pahlā naam duniyā dūsrā diiñ hai

ki rāh-e-ishq mere haq maiñ behtar yuuñ bhī hai yuuñ bhī

maiñ ḳhvāhir-zāda-e-haidar bhī huuñ shāgird-e-haidar bhī

mirā mulk-e-suḳhan pe qabza 'qaisar' yuuñ bhī hai yuuñ bhī

hasin aur us pe KHud-bin wo sitam-gar yun bhi hai yun bhi

nazara qabza-e-qudrat se bahar yun bhi hai yun bhi

jau ye bismil haya se hai to wo majruh dekhe se

nigah-e-naz us qatil ki KHanjar yun bhi hai yun bhi

jabin us dar pe hai wo dar hai uncha arsh-e-azam se

buland auj-e-surayya se muqaddar yun bhi hai yun bhi

idhar wo mujh se barham hain udhar mayus-e-nazzara

ki meri umr ka labrez saghar yun bhi hai yun bhi

aqidat tujh se bhi hai baiat-e-dast-e-subu bhi hai

jo saqi rind hai haqdar-e-kausar yun bhi hai yun bhi

meri manzil ka pahla nam duniya dusra din hai

ki rah-e-ishq mere haq main behtar yun bhi hai yun bhi

main KHwahir-zada-e-haidar bhi hun shagird-e-haidar bhi

mera mulk-e-suKHan pe qabza 'qaisar' yun bhi hai yun bhi